Mororobuat Pulau Banggi minongiduan karaja kabun montok mamaramai do Wulan Kabansan
KUDAT: Amat Onoh, 64, mantad Karakit, Pulau Banggi, sundung pia koilo sakot id kabun kouwaan ngawi disio nangakanaru noh nga au isio muhang oiduanan montok mogiwowoyo miampai mogigion ngawi Kudat montok mamaramai do pangaramitan Wulan Kabansaan.
“Mimang baino diti atangkangau id kampung. Baino timpu rumasam kalapas timpu mangadau nopupusan di timpu nakatalib, sakot id kabun kouwaan ku id Pulau Banggi masaon lumang ko u ... a patut borosian.
“Au monguro, duanan ku naamot timpu montok abaabayan diti,” ka dau doid Bernama ontok romuto id abaabayan Merdeka@Komuniti bogian pogun hiti konihab.
Abaabayan pinanjur Koupisan Kopoilaan Sabah dilo pinotimpuun di Panakadai Montiri Kotundaan Pomorunan Sabah Datuk Bokiah Ismail.
Amat ih nogi nokopinsin Koupisan Talun Alun (JKR) otopot kopio ounsikou om oropod sabap kaanu umampai paparamai do koyuon pangaramitan Wulan Kabansaan id watas ‘paling utara’ id Sabah dilo.
Ka disio kiharo kiikira 300 guas tuwa mangga id kabun dau id masaon mongua.
Tumanud di Amat, mantad podi tadau Kaapat disio kiharo id kakadaian Kudat om naamot magandad abaabayan tadau diti om abaabayan pitimungan lalansanon UMNO Zon 1 suab, ih potimpuunon doti di Porosiden UMNO Datuk Seri Najib Tun Razak, poingiyon isio id lamin tanak disio hiti.
Kokomoi abaabayan Merdeka@ Komuniti dilo, ka disio ino kirati kopio om mositi nogi ampayaton di sinakagon tomulok sabaagi tanda mamagatang do kinalantayan (kemerdekaan) pogun di nosigampot solinaid diti.
Abdul Hasim Hama,47, nogi mantad Karakit nopo nga minoboros do kinorikotan disio doid abaabayan Merdeka@Komuniti nopo nga sabap kopongunsuban sunduan ‘patriotisme’ di kakaal agaras lumuyung idsuang tinan dau sabaagi bagas susumangod di nokopinsin mantad kotorinaan id toun 2007.
Isio ih nokorikot mantad pulou mantad podi kosuabon songkosodop miampai suminakai feri solinaid kiikira sojam, minoboros do kasanggup isio osusa kopio rumikot mantad pulou bulun noh montok miwoyo tulun ngawi om momuruan mamaramai do pangaramitan wulan kabansaan id tana tagayo Kudat.
“Montok dogo, mimang ginawo ‘patriotik’ idsuang tinan ku mimang aralom om kinalantayan nopo nga koubasanan (sinonim) miampai sunduan doung susumangod ku mantad pogi pakaraja oku gisom nokopinsin oku. Au oku momudali mongiduan karaja tikid tadau suai montok tumindapou id abaabayan diti,” ka dau.
Abdul Hasim ih nogi ponorikohon Komuniti 1Malaysia Karakit minoboros do iso mantad tonggungan dau nga mamaramai kagu sunduan ‘patriotik’ om sunduan oupus do pogun om mongunsikou ‘tingadau’ kinoburuon di nosigampot pogun, doulu noh Sabah kumaa toinsanan rayat di mogisusuai tinaru, bansa om agama doulu noh id bogian dau.
“Nung toun 1980-an pogulu, mantad Pulau Banggi pakaayan id tana tagayo Kudat, mogigionmomoguno bot ngawi tulun kampung toiko monginsada om maganu timpu tolu gisom apat jam montok rumikot, nga miampai kotorinaan feri miampai kopongorumpos gisom 200 susumakai baino, ino maganu timpu sojam noh. Iti noh iso ‘tingadan’ kinalantaian,” ka disio.
Mohd Asri Awat, 49, ih nogi ponorikohon Tinan Koburuon om Koumoligan Kampung (JKKK) Kampung Telutuh, Pulau Banggi ih nokorikot kosodop montok abaabayan kosuabon diti nopo nga minoboros, kasanggup isio papalabus balanja sondiri bulun noh montok tumindapou abaabayan di obuli momurimon kopurimanan ‘patriotik’ dilo.
Tumanud disio abaabayan ‘kemerdekaan’ miagal dilo okon pinanjur montok ‘suka-suka’ noopo katapi ih lobi kiguno mantad dilo nga montok monorimo om momurimon do pinongulubukan tagayo di noumbalan nawayaan sinakagon gulu poh montok kapaganu do ‘kemerdekaan’.
“Osonong nogi sokiro ko agensi koporintaan kikoompitan kaanu papaharo do ‘roadshow’ id kampungkampung montok papatarang do rati torooropot kinalantayan montok toisoiso pogun tuh sinakagon tomulok di akaal oribau toilalaan om kopurimanan diolo kokomoi ‘merdeka’ kaanu asil,” ka dau. -Bernama