UMNO mositi minsingubas ‘dasar inklusif’ ...montok popindaama ahal moningolig rayat om popotounda pogun - Najib
KUDAT: UMNO mositi tumilombus minsingubas id kosolimpuunon poingamung ( dasar inklusif) montok miirad tambalut pulitik id suang Barisan Nasional ( BN) nangku toiko kumaa rayat Malaysia koinsasanai montok papatantu do ahal moningolig rayat om popotounda pogun kotilombus kaanu papanau, ka di Datuk Seri Najib Tun Razak.
Luguan montiri om porosiden UMNO minoboros sabaagi suntu, nung id Sabah kiharo lobi 60 tinimungan ‘ etnik’ om ‘ sub etnik’, om tantu koinsanai tinimungan ‘etnik’ dino nokomoi mositi sumiliu pokimamaan tonggungan UMNO, BN om porinta montok manahak pongoligan.
“Roiton ku UMNO mositi poingamung ( inklusif). UMNO okon nodi ‘ eksklusif’...( ahal) Kuut Adat pogun id Sabah yoho sabaagi luguan montiri manahak poruntukan. Kobolingkangan Tana Adat onua ku poruntukan om ogumu poh kagu mooi kaanu tokou momurimon do Malaysia diti tokou sanganu.
“Malaysia diti tokou sanganu, au mongira isai tinan tokou katapi tokou mositi haro tiwou oiyo kotokou,” ka dau ontok minanahak boboroson pinotimpuun do Pitimungan Lalansanon UMNO Zon 1 hiti konihab. UMNO Zon 1 kapaamung Bogian Kudat, Kota Marudu, Kota Belud om Tuaran.
Nokotindapou ogi ih Boyoon Montiri Sabah ih nogi Ponorikohon Tinan Piturubungan UMNO Sabah Datuk Seri Musa Aman, Montiri Komunikasi om Multimedia Datuk Seri Dr Salleh Said Keruak, Presiden Parti Bersatu Sabah Tan Sri Joseph Pairin Kitingan om koinsanai boyoon UMNO bogian Zon 1.
Mikuo minoboros do kaangkaban dau montok mintong pironitan togirot om misompuru rayat Malaysia id Sabah om Sarawak miampai Semenanjung ‘ bagai rambut bersimpul mati’, minoboros ih Najib do miampai haro nopo kagarasan koposompuruan rayat Malaysia irad dilo, nunu noopo ponokialitan di rumikot kaanu monoguang miampai kalantoi.
Poingkuro poh nga, ka dau, montok poposigampot do gaab dilo, kaandangan pulitik mositi haro om id Sabah, kiharo kaandangan pulitik mantad podi UMNO tuminapak id Sabah di ontok 21 Februari 2009 om baino kiharo kiikira 546,850 puru id 5,676 raan id toinsanan 25 bogian.
“Iti nopo nga iso mantad ramuan kinalantayan. Soira haro kaandangan pulitik tokou, tokou mositi poingigit doid UMNO om BN sabaagi koposompuruan pulitik montok rayat pogun Sabah. UMNO mositi popindaama do kopontingan toinsanan tinaru. Tokou okon parti ‘komunal’,” ka di luguan montiri.
Minoboros ih Najib do suai ko ilo, koumoligan om ‘kedaulatan’ Sabah mositi potilombuson om isio mongintong totootopot kokomoi ahal koumoligan om ‘kedaulatan’ Sabah.
Ka dau sundung pia aiso pogun id pomogunan obuli manahak jominan montok koidu (oismbayan) mantad nunu noopo pongundoronokan 100 paratus, nga Malaysia baino diti nakaanu minangantob piipiro pongundoronokan mantad antakan sabap kopongintangan totootopot koporintaan BN nokomoi koumoligan pogun.
Pinatarang di Najib do tumilombus isio gumaga do ‘ kedaulatan’ Sabah montok papatantu do kobulihan Pogun Idsiriba Tongus, doulu noh idsuang sektor ponombuluian di maidlaid mingkawas, kaanu popotounda om nogi kaanu manahak lobi togumu asil kumaa rayat id pogun diti.
Minoboros ih luguan montiri do ahal kotundaan, kotundunan om ‘ untung nasib’ timpu tabantalan rayat nogi mositi tamangan om rayat au momoduli kokomoi ahal 1Malaysia Development Berhad (1MDB) sundung pia ahal dilo rulanon do porinta sabap ih pokiuhangan rayat noo nga kotundunan diolo toririmo ogompi.
Namot dilo, narayou di Najib kopomuruanan UMNO Sabah id siriba buruanan di Musa sabap pinoposilu Sabah sabaagi pogun di poinggugumu puru sundung pia umur dau poinmumulok kopio nung piagalon miampai UMNO id pogun ngawi suai.
Ka dau UMNO Sabah okon noopo nosiliu pikoruhangan UMNO miampai ginumu kopuruan poinggagayo om kagu nga UMNO pogun dino nokomoi nogi nakaanu pinapaamung id tinan puru om kopomuruanan dau montok mongigit doid ‘gatang’ oupus kumaa tambalut di osusa nangku toiko asanang.
Kokomoi tolu kopokionuon UMNO Bogian Kudat ilo nopo nga pamansaian iso sikul pintangaan agama, pamansaian ralan pomoting Bongkol-Telaga, om manahak pongintangan nokomoi kotundaan Pulau Banggi ih ponogi pulou poinggagayo id pogun diti, doulu noh idsuang sektor ponombuluian, noboros di Najib do manahak sisio ponimbangan di kangaam kopio nokomoi atag dilo. -Bernama