PC Methanol Labuan popogiot ekonomi Labuan: Sazali

LABUAN:PETRONAS Chemicals Methanol Sdn Bhd (PC Methanol) ih papanau kotoinaan id Labuan, nakaanu pinopogiot do kotundaan ekonomi pulou diti hoohobi id suang sektor pomounan, petrokimia, tumau om gas, om nogi koponohuod doid kopoingkavasan gontob kopoposizon tuhun ngavi kinoizonon.

Potunud ponoinaan ih nogi Huguan Upisol Eksekutif Tinimungan Petronas Chemical ( PCG) Datuk Sazali Hamzah minoboos do PC Methanol papanaon di soosomok 60 piatus layat kinoizonon Labuan om nogi Sabah.

“Id timpu ih iso’i, kinahantazan PML nogi sokodungon di agensi- agensi Kopolintaan om komponi ngavi misosondii ih minggisom popobuu do pomounan petrokimia maza kotoinaan infrastruktur miaga kapanaakan lotilik, vaig om kalaja ponokodung,” ka disido doid Bernama.

Minoboos isido PC Methanol, tanak komponi pango petrokimia PETRONAS, PETRONAS Chemicals Group Berhad kivaa id impoon di ogiot montok papadadi do Labuan ‘ hab metanol’ ointutunan id pogun diti montok momogonop do kopokionuon ‘ metanol’ pomogunan ih samakin mingkavas.

“Miampai ‘ kapasiti’ pangahabusan soginumu 2.4 lizong tan metrik sontoun, PC Methanol nopo nga pangahabus metanol poinggagazo id pogun Asia Tenggara om ih komo-apat poinggagazo id pomogunan.

“Koponohuod nogi PC Methanol miampai kotihombus doid ekonomi pogun maza kinoingkavasan ‘ eksport’, maganu haang sabaagi popogiot doid pomounan petrokimia pogun, mongunsub do kaampazatan komponi kinoizonon ih poposodia do kotoinaan om bakaang ngavi panadaan, pomo’uangan kosivatan pakalajaan om kapaagatan ekonomi,” ka Sazali.

“Miaga nogi miampai pomounan ‘ logistik’ tavan, daat om tinda, id nombo projik panadaan Logi Metanol Koduvo PC Methanol nokopoingkavas no kopokionuon doid kotoinaan di posodiaon di sektor dino,” kavagu disido.

Namot dino, minoboos zi Sazali do popouhan nogi komponi do mogisusuvai abaabazan tonggungan sosial korporat (CSR) kopoompit nogi manaak pongintangan poimponu, ponohuodan doid mogiigizon songkoizonon, kotundaan tuhun kiguno om pomogompizan kinoizonon posoihi.

Piahatan dino, PC Methanol songovian mogiigizon miampai misokodung boogizan monguasa kinoizonon miaga Kotinanan Labuan, Koupisan Bomba om Mongumohig om Pulis Diraja Malaysia ( PDRM) mongumbasi om momogompi boogizan Kampung Rancha-Rancha Laut.

Nakapanganjul nogi PETRONAS do Abaabazan Pomogompizan Tisan Daat montok momogompi boogizan poingompus tisan daat Taman Damai om popoingkavas sunduvan oupus do kabaakasan tisan daat om kapaagatan pusingon mahik, ka disido.

Minoboos isido id siibo ‘Program Sentuhan Ilmu’ PETRONAS ( PSIP), PC Methanol nogi mogisosokodung miampai sikul montok do naamot (sekolah angkat) PETRONAS id Labuan kaamung Sikul Kabansaan Rancha-Rancha, Sikul Tosiibo Kabansaan Bebuloh om Sikul Tosiibo Kabansaan Patau-Patau montok poposoibau sinakagon timpu tabantahan di kinangazan tavasi.

“Suvai ko iho, montok popoompit do lahan tonudon papavakas tuhun maza balajalan, PC Methanol miampai misokodung Yayasan Momuu’an Balajalan Mamasok, Pomounan Pinghudaan Pomounan Labuan om Koupisan Vinakas Kalaja Labuan nogi nakapanganjul no ‘ Program Skill Iltizam’ montok manaak do kopointahangan doid tanak tomuhok kinoizonon.

“Apantod nogi PC Methanol montok papanau do kalaja ngavi ih papatantu do kapaagatan dosido tomoimo kivaa idsuang binduugan om kapatantuan di au kopomiumbak do kinoizonon posoihi, om au mangasou kohumaagan om kotoonongan tuhun ginumuan,” ka disido. -Bernama