Songulun kusai noduso, apat ‘suspek’ tinahan pulis
KINABATANGAN: Pulis hiti minanahan apat kusai kikotumbayaan do nokohompit idsuang pinogioduhan ih natadon do songulun kusai noduso id kinantakan id iso lamin kongsi, iso kabun hiti di sodop Koonom nakatalib.
Luguan Pulis Watas Kinabatangan Superintendan A Sahak Rahmat minoboros do kaapat-apat ‘suspek’ kiumur bindurugan 16 gisom 29 toun dilo tinahan id tampat misusuai di kosuabon konihab.
“Id kinantakan kiikira jam 7.45 dongotuong dilo, munggui nointutunan sabaagi Andy Arif Fatah, kiumur 47 toun, minidu pogun id tampat kinantakan sabap kinosindualan di notoguang dau,” ka dau.
Minoboros isio do munggui ih nosuhatan id ponong tipus ponong gibang, nosuhatan id sasahanan gibang, nosuhatan ponong siku gibang om ponong tohuri kakod gibang.
Pogului dilo, kiikira jam 1.40 minsusuab, pulis pinapaharo do kinagakaman koiso ‘suspek’ id upis sekuriti, iso kabun id Bawang Segama kikotumbayan nokohompit miampai kes dilo.
“Kalapas kiikira jam 6.20 kosuabon konihab, kinagakaman koduo ‘ suspek’ pinapanau id iso pomulaminan kabun pakaraja, id Litang Utara Kinabatangan. Om duo kagu ‘suspek’ ginakom pulis kalaps diri,” ka dau mikuo minanamba, koinsanai ‘ suspek’ nowit doid IPD Kinabatangan montok ponoriukan potilombus.
Minoboros ih Sahak do pinonoriukan pulis nokoilo do ontok tadau kinantakan pinioduhan id pialatan munggui miampai ‘suspek’ tagayo ih kinoruhang di tolu kagu kusai.
“Id kinantakan dilo, kaapat-apat ‘suspek’ minogowit dangol minoi id lamin munggui. Natadon kinantakan nopo nga mantad kobolingkangan tanak tondu munggui miampai sawo dau (suspek tagayo) hinonggo tanak tondu munggui miniyon id lamin tapa dau (munggui) sabap sawo dau asaasaru moninduol, momobog dau om kinontodonon do tanak tondu munggui au katahan miampai koyuon dilo.
“Kinorikotan songulun kusai ino nopo nga tambalut munggui id lamin munggui natadon do ‘ suspek’ ruminikot id lamin munggui montok mongimang tambalut munggui,” ka dau.
Poingkuro poh nga ka dau, natahan nodi munggui ih ‘suspek’ dino mantad minsomok dau om minonuhu tambalut dau mogidu. Sumusuut dilo, suspek ih pinapatarab dangol ih poingigit dau id ponong munggui katapi nosiwatan tinangkis di munggui om natadon do nosuhatan id susahanan gibang om nokosiwat minomoliad ‘suspek’.
“Nga, songulun mantad ‘suspek’ ruminikot mantad tohuri munggui om pinapatarab dangol id ponong gibang tipus munggui minomoguno duo longon dau om kinontodonon do noindamaan nosindualan id ponng gibang tipus munggui.
“Kalapas diri pinokiwos kagu disio dangol dilo id ponong pakou munggui om nosuhatan nogi,” ka dau.
Minoboros ih Sahak do kalapas munggui nakalatan, songulun kagu ‘suspek’ minonobok id ponong gibang munggui gisom sikul munggui nosuhatan. Om songulun kagu ‘ suspek’ minonibas kakod gibang munggui.
Minoboros isio do munggui dino noiduan noh ginawo id tampat kinantakan om kinakat di sawo munggui kuminaa idsuang lamin gisom nokorikot kokuasaan pulis id tampat kinantakan.
“Munggui dino nowit doid Hospital Lahad Datu montok laang potilombus,” ka dau, mikuo minanamba, nahau nogi pulis o sinjata ih kikotumbayaan ginuno di ‘suspek’ id kinantakan dilo.
Kes dilo soriukon tumanud Seksyen 302 Kanun Koinggoritan.