MKN Sabah minanaan 116 PTI id Penampang
PENAMPANG: Kiginumu 116 modidikot aiso kasagaan (PTI) posoihi uvnag diti tinaan id ‘Operasi Bersepadu’ Pogun Sabah tuminimpuun jam 1 minsusuvab gisom 8.30 dongotuvong tadau Koonom nakatahib.
Kumoduvo Potunud Koumohigan Pogun Tinan Koumohigan Pogun ( MKN) Pogun Sabah Sharifah Sitti Saleha Habib Yussof minoboos do mantad ginumu dino nokomoi soginumu 103 PTI layat Filipina om 13 tuhun vagu layat Indonesia.
Tumanud disido, saavi- avi kinagakaman kiumul id binduugan sizam gisom 61 toun.
Ka disido operasi Siri 14/ 2016 dino montok koinsasanai minomolisa soginumu 362 tuhun ih noihaan sabaagi PTI.
“Soginumu 157 tuhun tinan montok pomolisaan potihombus id Hongkod Pomolisaan Dokumentasi.
“Kahapas pinomolisaan tinoodo, soginumu 116 PTI tinaan tumanud Seksyen 6 (1) (C) om Seksyen 15 (1) (C) Akta Imigresen 1959/63 (Pindaan 2002) om Kootulan-Kootulan Imigresen.
“Koinsanai PTI nokoompit tinaan reman id Hongkod Panaanan Naamot ( PTS) Kota Kinabalu Manggatal,” ka disido id kopoihaan doiti di tadau Koonom nakatahib.
Minoboos isido mantad po di vuhan Janurai gisom 27 Ogos toun diti, soginumu 1,880 PTI tinaan mantad 5,651 tuhun ih pinolisa.
Gisom baino diti pinatahang dau do PTI ih tinaan om kivaa id PTS pointongkop Sabah nopo nga soginumu 5,058 tuhun.
Tumanud dau iho kaamung no 1,533 tuhun id PTS Kota Kinabalu, 1,565 tuhun id PTS Sibuga; 1,277 tuhun id PTS Tawau; om 683 tuhun id PTS Papar.
Suvai ko iho ka disido montok timpu ih iso’i, soginumu 16,053 PTI nakaatod no muhi doid pogun sanda-daau.
“Toun diti layat Filipina ih pinaatod muhi nopo nga soginumu 12,824 tuhun, layat Indonesia soginumu 3,084 tuhun om 145 tuhun suvai-suvai kalayatan.
“Operasi timpu diti nogi nakaanu pisokodungan Pulis Diraja Malaysia ( PDRM), Koupisan Imigresen Malaysia, Koupisan Kopolijistahan Pogun ( JPN), Koupisan Vozoon Montili (JKM), Koupisan Panahanan Tuhun Ginumuan Malaysia (JPAM), om Dewan Bandaraya Kota Kinabalu (DBKK),” ka disido.