Nunu kootuson nung kotungkus do tangaanak tulun Kadazandusun o BKD?
Kadazandusun (BKD) timpu baino naramit no do Porinta Ponontudukan Malaysia (Malaysia Ministry of Education) do potudukon kumaa susumikul id sikulan tosiriba (primary school), id sikulan piintangaan (secondary school), id Institute Pingludaan Mononontuduk (Teacher Education Institute) om id University nogi iri no UMS om UPSI. Piipiro kootuson nung kotungkus o boros Kadazandusun kumaa tangaanak tulun Kadazandusun.
Koiso, koimagon o tinaru Kadazandusun id pomogunan diti om ointutunan dilo Sinompuruan Pogun Sompomogunan (United Nations).
Koduo, kaanu kosimbayanan do mimboros do boros tinaru o tulun ngawi Kadazandusun hinonggo nopo yolo poimpasi id pomogunan diti.
Kotolu, oturidong om kotimporon o susuyan montok Nunuk Ragang sabaagi nontodonon tungkus do tulun Kadazandusun.
Kaapat, atampasi ralan pomusarahan tulun Kadazandusun id pomogunan diti.
Kolimo, kasanganu o tulun Kadazandusun do sontob ngawi kinoiyonon i nonuan ngaran mantad do boros Kadazandusun.
Koonom, kotilombus koubasanan manaandak kaamatan tikid toun.
Koturu, koturidong o tulun Kadazandusun do Tiyonon Pongusinan (Kadazandusun Financial Institute) i miagal no do bank. Osonong do onuan pongimbarasan togumu montok tikid kootuson dilo narait id sawat.
Kotuson koiso, kiguno kopio mantad no do boros no o pogintutunan do tinaru. Sinompuruan Pogun Sompomogunan manu do atampasi ngawi boros tinaru id pomogunan diti. Au noilaan somonu nung kopiimpori-pori momorinta pogun sabah om osiliu doti do boros lingua franca Kadazandusun o BKD.
Boros BKD gunoon boros piturubungan id duta Kadazandusun id pogun suai. Kootuson koduo, tulun Kadazandusun kiharo walai panambayangan id labus kakadayan om id kakadayan hinonggo milo yolo do mimboros do BKD om au nodi minog mimboros boros Malaya om Indonesia.
Kootuson kotolu, mantad boros do ointutunan tinaru Kadazandusun mantad no do boros o winayaan do pomusarahan gulu-gulu tulun Kadazandusun i kaampai no ngawi boros gunoon do Bobolian.
Tadau om Tadauwulan (Calendar) do Kadazandusun ointutunan nodi id pomogunan do nakasaap (nokoilo) o tulun Kadazandusun popoturidong do Tadauwulan sondiri tumanud do BKD om au tumanud do Tadauwulan tulun Rum ( Roman Calendar).
Kinopomorunan do Tadauwulan Kadazandusun dino manahak do tulun Kadazandusun do iso koingkokoton tinaru i agaras om otimporon id pomogunan diti. Kootuson kaapat, boros do Bobolian atampasi om kosurat id buuk om oguno kakamot basaon tanganak sikul om haro nogi koopi id lagkaubuuk om id museum.
Kootuson kolimo, BKD milo gunoon do poposurat ngaran kinoyonon om kopoilaan i haro id pototongkop pogun diti. BKD osingilaan do mononombului ngawi i mandaha mantad labus pogun. Gunoon do Monunupu ngawi sinding Kadazandusun o BKD do monupu sinding Kadazandusun.
Sinding di nosupu kosudong sindingon id walai panambayangan, linaging podsindingan id KDCA soira maso sugandoi, BKD gunoon do mongulud om popootus abaabayan tadau kaamatan id KDCA om hinonggo nopo haro abaabayan miagal dilo.
Kootuson koonom, tinaru Kadazandusun ointutunan mantad do boros. Boros Kadazandusun milo nodi gunoon manahak boroson id dumbangan tinimungan togumu hilo id Sinompuruan Pogun Sompomogunan (United Nations).
Nunu nopo kakamot Kadazandusun i kaampai no saxophone wulu, tagung, sompoton, bungkau, tongkungon, roiton om loyou (lyrics and melodies) sinding Kadazandusun, pomomoinan mogunatip om susuai po.
Kootuson koturu, mononontuduk (mongingia) tulun Kadazandusun milo alapon do paganakan ngawi tulun Kadazandusun i kotimporon miyon id pogun suai (miagal ko hilo id Australia, England, USA, Malaya, Sarawak, Brunei, Singapore om id susuai po kinoyonon do monuduk tanganak diolo do BKD.
Kaanu pongobian kousinan o tulun Kadazandusun soira kaanu kagarasan tinaru do monuridong sikulan om university Kadazandusun id pogun diti. Tulun Kadazandusun i angapantang om kikousinan kaanu momudali tusin om poturidong Poyanan tusin tinaru om manahak do pongobian sikulasip montok susumikul Kadazandusun do mongoput sikulan takawas id labus pogun.