Mongilag kolowongon papanau karaja, pogoduhan mamain ‘Pokemon Go’ id premis porinta
ahal ih toririmo kapamangasou pomusarahan sosongulun mamain ‘Pokemon Go’ obuli kapanahak do kobolingangan di au osonong om kopongundoronokan sokiro ko au tamangan miampai totootopot.
Sumusuhut dilo, piipiro tinan porinta nakapangalabus noh ralan tonudon papatantu do koiyonon pogoduhan id posorili ‘ premis’ diolo montok silihon do tiyonon pamainan.
Panakadai Monorina Zamzali Itong, 36, minoboros do sundung pia pamainan dilo okitonan kaanu popogirot do piombalutan pialatan tulun ngawi, nga ilo obuli kopongimbulai do kolowongon sokiro ko au tamangan.
“Koyuon diti kaanu poposiliu pakaraja doulu noh pakakaraja tulun ginumuan alawong montok papanau do tonggungan diolo kumaa tulun ginumuan.
“Kagu nga, sabap do oindamaan minggisom mamain, asanang olihuwan diolo karaja di apatut wonsoyon gisom akasou korikohonon karaja diolo,” ka dau.
Tumanud Cikgu Nur Sayahida Abdul Manap, 30, pogoduhan ih papanaon di piipiro agensi porinta dilo kangaam kopio sabaagi laang montok mongingkudi do ‘ketagihan’ pamainan dilo.
“Pamainan diti au apatut do papanaon ontok timpu pakaraja sabap ilo kaanu mongingkudi do ‘produktiviti’ idsuang pakarajaan.
“Ino nogi kontodonon dotokou okurang manahak pongintongan totootopot do nunu noopo karaja di pinatahak gisom kopomiraag do ngaran tosonong toiko ngaran komponi,” ka dau.
Puru bomba Mohammad Zulrizan Julparael, 24, kosokodung laang irad dilo sabap pamainan dilo otopot kopongimbulai do kapatangabab nokomoi do tulun ngawi.
“Pogoduhan mamain do pamainan diti id potitikid linominon ( premis) ponokotanda do kikoinsamadan om kikosianan bogian pointantu montok mangantob ahal di au apatut antakan dilo.
“Paminan diti nogi kinoilaan do kiharo bakaang koponoinuan tiyonon di kiharo doti kobolingkangan kapangasou do koumoligan tinan, paganakan om kopoilaan pogun,” ka dau.
Cikgu Sabturiah Edris, 28, minoboros do pamainan dilo nogi obuli kapanahak waya taraat doid kapaganuan internet id linominon porinta.
“Kogunoon diti momoguno do kapaganuan internet di agaras o tantu noh do pakaraja toiko tulun ginumuan momoguno doti do WiFi id linominon montok mamain.
“Sokiro ko aslaan momoguno do WiFi upis, ino papasanang do ‘ penggodam’ kapaganu do kopoilaan kiguno porinta montok mogisusuai tujuan,” ka dau.
Panakadai Ponorinaan Susumikul Shaney Saintim, 21, nogi kaakun miampai pogoduhan dilo sabap ‘ premis’ porinta tinuridong montok monorina karaja poimbida noopo.
“Tulun ngawi apatut mongilag mantad kasala momoguno do koiyonon poimbida montok kogunoon tinan sondiri doulu noh id upis porinta,” ka dau.
Cikgu Chely Fathra Juanis, 26, minoboros do pamainan dilo nogi obuli kontodonon do kopoompuongon pomusarahan toiko tiwou gisom kopongimbulai do au momoduli do ahal kolidasan tinan, posorili om susuai poh.
“Sokiro ko pakaraja doulu noh pakakaraja tulun ginumuan oindamaan ‘atagian’ miampai pamainan diti, ino miampai kotilombus kaanu poompiton miampai tiwou om pisosoromo piromutan pialatan tambalut soingkaraja akasou doti,” ka dau.
Misuai miampai Ponulung Akauntan Hazwani Mahali, 30, opurimanan disio pamainan ‘Pokemon Go’ obuli osiliu kaparagatan id labus toi kapasanang do pomusarahan ih kopongimbulai do tulun ngawi aparagat om popogirot kagu piombalutan.
Sundung pia irad dilo, mangatag isio tuh tulun ngawi kaanu sumiliu momomoguno ih momogonop do tinan miampai toilalaan om kooturan pomogunaan internet om kogunoon dilo miampai tososonong.
Kogunoon ih sinupu do komponi Niantic Incorporation Amerika Syarikat ( AS) dilo nokosuang noh Malaysia di ontok 6 Ogos nakatalib om baino nakaanu pangaramitan di kobilangan kopio maya pamainan di obuli posuangon mantad ‘Play Store’ om ‘App Store’.