‘Sindiket’ dadah nagakom pulis # Tohu ‘suspek’ tinaan, kaamung songuhun tondu
KOTA KINABALU: Iso tinimungan ih papanau kapaagatan tohosok (sindiket) papatazad dadah ii momoguno haang ( taktik) kavavagu nakaanu ginakom pulis id pinonugkuan kiikila jam 3.30 sosodopon tadau koonom nakatahib.
Huguan Pulis Uvang Kota Kinabalu Asisten Komisioner M. Chandra minoboos do pinonugkuan dino tinoodo id doumbangan iso premis taakanan om boogizan parkir id Likas Square, doiti.
Tumanud dau tohu ‘ suspek’ tinaan, izioho nopo duvo kusai om songuhun tondu kiumul id binduugan 27 gisom 36 toun.
“Sindiket kapatazadan dadah asaasau monimban ‘taktik’ om lahan kapatazadan montok poposout do mato pulis.
“Kinagakaman baino diti minomoguno do ‘ modus operandi’ miampai pinopohosok dadah kavo syabu kivinagat kiikila 304.44 gram id suang iso kotak tiinumon,” ka disido id iso kopoihaan doiti koniab.
Minoboos isido pinonugkuan pinapanau di sontimungan upisol om puu mantad Boogizan Ponoizukan Koimaan Talaat Narkotik Hongkod Pulis Uvang (IPD) Kota Kinabalu.
Minoboos zi Chandra do asil pinomolisaan doid ‘suspek’ nokopokito do iso beg plastik kivotik oitom kisuvang onom paket kikotumbazaan dadah kavo syabu.
Tumanud dau duvo suspek kaamung tondu dino nokomoi tinaan id doumbangan premis taakanan om songuhun vagu suspek ginakom id boogizan parkir.
“Pinoniisan vaig sobu nokoiho songuhun suspek kusai ‘positif’ dadah om gatang pinamahauan dadah piaga-aga do kiginumu RM39,000.
“Na’au nogi iso kulita Toyota Vios, iso Perodua Myvi, iso jam hongon, om duvo sinsing amas.
“Kotohu-tohu kinagakaman soizukon tumanud Seksyen 39 B Akta Dadah Kohigogon 1952 om tinaan reman gisom gisom 3 September 2016,” ka disido.
Minoboos isido kinahantazan kinagakaman dino ponokotanda do pulis hoohobi Boogizan Ponoizukan Jinayah Narkotik IPD Kota Kinabalu tomoimo minggisom manangod kapaagatan kapatazadan dadah id pogun diti.
Monongkotohuod nogi boogizan dosido doid tuhun ngavi ih sohinaid diti minonuhung minanaak kopoihaan kikoompitan dadah di antakan id posoihi dosido.