Lobi 500 puru karaja SESB pakaraja 24 jam kopinamot Tadau Kabansaan Kada koimbayatai tinan pointantu momiraag do kolumagan pogun - Sapawi
KOTA KINABALU: Lobi 500 puru karaja Sabah Electricity Sdn Bhd ( SESB) kumaraja 24 jam sangadau miampai mogisosowoli montok papatantu do kopoluyungan kapanaakan winakas lotirik miampai potilombus kumaa momomoguno poompus pangaramitan Tadau Kabansaan toun diti.
Monijor Tagayo Wanan (Pengurusan Aset) SESB Muhamad Nazri Pazil minoboros do ginumu diti kopohompit do puru karaja SESB id Bogian Pamahagian, Bogian Kapamansaian Winakas, Bogian Kapangatadan om Bogian Sistem Operasi id pointongkop pogun Sabah om Tana Pisompuruan Labuan (WPL).
“Pongintongan om koposodiaan tosikap di onuon diti nogi kaanu doti papatantu do laang tosikap kaanu papanau sokiro ko antakannunu noopo akasou lotirik,” ka dau id iso kopoilaan.
Minoboros isio do otumbayaan nogi SESB do piipiro laang tosonong di naanu noh pogului diti miagal pinoimaganan ‘Ops Secure’ id bogian Kota Kinabalu kaanu doti manahak asil tosonong nokomoi kararalanon kapanaakan winakas lotirik id pointongkop pogun Sabah om WP Labuan.
Mantad podi piipiro tadau pogului diti, kiharo piipio bogian id pointongkop Sabah om Labuan nokotoguang nakasou kopoluyungan lotirik sabap mogisusuai kobolingkangan kaamung noh ‘set janakuasa’ nokotompul.
Noboros di Muhamad Nazri do momoguno nopo nga pinosorou montok rumomut numbur Careline SESB id 15454 toiko 088- 515000 sokiro ko koiyonon diolo oputulan kapanaakan lotirik mooi kapaganu laang monginsonong idsuang timpu tosikap.
Bogian ponorinaan om puru karaja SESB nogi maganu kosiwatan diti montok mamason ‘ Selamat Menyambut Hari Kebangsaan 2016’ kumaa toinsanan momoguno. SIPITANG: Pinosorou o sukod tomulok tuh au oimbayatan miampai tinan pointantu ih muhang momiraag kolumaagan om kotoonongan pogun.
Puru Parlimen Sipitang Datuk Sapawi Ahmad minoboros do kopolunggui ginawo kopio om koposodi ginawo miampai wookon sinakagon tomulok om susumikul ih noimbayatan om otombirangan miampai pamagayatan tinan di haro ahal sosondiri.
“Kolumaagan om kotoonongan di naanu au mositi do punsoon katapi kangaam kopio potilombuson tokou om papatantu ahal dilo kotilombus oguno di sinakagon tomulok ngawi do tohuri tadau,” ka disio ontok romuto kalapas pinotimpuun do ‘ Program Moh Ngeteh’ Pangaramitan Tadau Kabansaan id Mini RTC Pasir Putih, hiti konihab.
Minoboros isio do kolumaagan om kotoonongan di naanu timpu diti nopo nga asil mantad karaja om kinapandaian nuludan kopomuruanan pogun.
“Koposodi kopio sabap haro wookon sukod tomulok ih kipalajaran uminampai do pitimungan pindalanan...tujuan diolo (sukod tomulok) iti montok momogonop noopo kopokionuon tinan pointant,” ka disio om minaanamba do koposodi ginawo nogi soira sinakagon tomulok paapraat toiko momohiu nuludan kopomuruanan.
Tumanud disio nuludan kopomuruanan ih kiharo baino diti toririmo minggisom montok papatantu do kolumaagan om kotoonongan kotilombus aanu do rayat.
Ka disio mogisusuai laang pinapanau om toinsanan nopo nga montok rayat om okon ko montok kogunoon tulun pointantu.
Kokomoi kapangaramitan Tadau Kinalantayan, minomisunud ih Sapawi do sundung pia papanaon miampai osuhatanan om osimbayan, ino kapanahak asil tosonong doulu noh montok popogirot sunduan ‘patriotik’ doulu noh id pialatan sinakagon tomulok.
Minoboros isio do pinggisaman popogirot sunduan ‘patriotik’ dilo kangaam pointalangon kumaa tangaanak ngawi om poingkawason kagu soira osukod yolo.
“Sinakagon di haro sunduan ‘patriotik’ tantu noh do au popologos do kinalantaian pogun diti do kosoon popolomi om iti noh ih pokiuhangan tokou... potilombuson kinalantaian pogun,” ka disio. Abaabayan dilo pinaharo do insan-insan id 958 Tabika Kemas Pasir Putih om Tabika Kemas Kampung Menengah Ulu Sipitang minamakai pakaian okitonan ‘ Jalur Gemilang’. Notindapou nogi do susumikul Sikul Kabansaan Ulu Sipitang abaabayan dilo.