Upisor wanan tinahan # Kikotumbayaan minanambarana om minangasou duo tanak tondu miapid dau

KOTA KINABALU: Songulun pakakaraja tulun ginumuan kipangkat wanan kotoguang doti do ukuman jiil, posuton om danda kalapas tinahan pulis sabap dinawa minanambarana om minangasou duo tanak tondu miapid dau id lamin diolo id Tenom, di tadau Kolimo nakatalib.

Pesuruhjaya Polis Sabah Datuk Abdul Rashid Harun minoboros do ‘suspek’ kiumur 43 toun dilo tinahan id lamin dau montok soriukon tumanud Seksyen 376(3), 377C, 377CA, om 354 Kanun Koinggoritan.

Ka dau, ‘suspek’ soriukon tumanud seksyen ih pinoboros sumusuhut minomonsoi kasalaan au tuminanud kooturan kaadat-adaton, minomonsoi kasalaan mianu-anu di au kopitunud miampai kooturan labus koyuon miampai aiso kasagaan, om manangod toiko momoguno laang tokodou koimaan taraat kumaa sosongulun miampai gaab mangasou daa koikuman.

Tumanud dau, maya pinonoriukan timpuuni pulis nogi nokoilo do ‘suspek’ minaganu laang minangasou duo tanak tondu miapid dau ih kiumur 14 toun mantad podi kiumur yolo turu toun nakatalib om minanambarana munggui id duo kinantakan misusuai.

“Kinantakan koiso pinoruput nantakan id lamin diolo id Tenom soira ‘ suspek’ minanambarana munggui om minangasou tadik tapid dau do namot tina munggui kiharo id tingkat sawat lamin om au nokoilo kinantakan kiikira jam 12 dongotuong ontok kolimpupuson wulan Koturu nakatalib.

“Munggui poingkuro poh nga minaganu laang miampai minomisunud kinantakan kuminaa tabang dau om kalapas diri minogidu miampai tina dau hiti om pinoporuput kinantakan id Upis Pulis Watas (IPD) Kota Kinabalu di ontok 28 Ogos nakatalib.

“Otumbayaan oku do ‘suspek’ dilo minomonsoi porobuatan dilo mantad podi munggui kiumur turu toun,” ka disio.

Noboros di Rashid do goduo- duo munggui songowian songulun kagu tabang nopo tanak ‘ suspek’ mantad sawo koiso dau om kiharo apat tanak suai mantad sawo koduo dau.

“Papanaon tokou ponoriukan koinsasanai kikoompitan kinantakan om ‘ suspek’ tahanon reman montok monulung ponoriukan kokomoi do kes diti,” ka dau.