Tuhun togumu ahapon tumanud piboi’an tanglung
PUTATAN: Ahapon o tuhun togumu montok mampazat do piboi’an monoodo ‘tanglung’ kopinamot ‘Festival Kuih Bulan’ ih poonjuol ontok 10 September dumonto.
Poniikon Panganjul Poh Wing Hiung @Foo minoboos do piboi’an dino ozuvon id One Place Mall Putatan om tombuhui tapantang ih pisosoomo kotindapou nga Kumoduvo Vozoon Montili Datuk Seri Panglima Yahya Hussin, Puu Parlimen Putatan Datuk Marcus Mojigoh om Panakadai Montili doid Vozoon Montili Datuk Edward Yong Oui Fah.
“Mongukab izikoi kaampazatan montok 40 tuhun id nombo piboogizon doid duvo ‘kategori’ iho nopo nga boogizan poingukab om susumikul. Potitikid kategori ampazaton 20 tuhun no, katapi sokio ko kaampazatan dino ogumu, timbangon dagai montok momo’uang tuhun.
“Kahantoi koiso montok boogizan susumikul kotoimo vava okitonan usin tunui RM400 om sijil. Om kahantoi koiso boogizan poingukab kopogovit muhi vava kiginumu RM600 om sijil,” ka disido id pitimbungakan abal doiti songkoniab.
Minoboos isido tadau koponutuban kopolijistahan nopo nga koniab (30 Ogos) poguhui jam 5 sosodopon om pinonupuan tanglung mositi pootodon ontok tadau piboi’an ontok 10 September piahatan jam 2 gisom 4 sosodopon.
Ka disido izioho ih tumanud piboi’an dino onuan poluntukan soginumu RM50 montok monoodo tanglung sanda-daau.
“Ingkuo po nga, nopo nga pokionuon montok momoguno do balangan gilingon mahik montok monupu tanglung sandadaau.
“Piboi’an diti nopo nga ozujon songovian One Place Mall, Koisaan Kotundunan Tiong Hua Putatan om Hongkod Kapaagatan Tuhun Nohoing ngavi UTC Kota Kinabalu,” ka disido.
Tumanud disido, tuhun togumu ih kotindapou id abaabazan dino nogi onua do ‘kuih bulan’ miampai aiso kabalai miampai lahan tonudon ‘isai kopoguhu isido kaanu’.
“Id abaabazan dino nokomoi, magahap nogi o tinan panganjul di Yahya montok popotimpuun do restoran Fook Yuen ih vagu po koukab doiti,” ka disido.