Ceaser momuu’an Upko Limbanak
PENAMPANG: Soginumu 300 tuhun kopoompit do sukod tomuhok om kogumuan dosido puu tabaa (profesional) pinapataak foom montok sumuang Koisaan Pasokmomogun Kadazandusun Murut Misompuu (Upko) id Kampung Limbanak, doiti.
Iho binuu’an di Tobpinai Ceaser Mandela Malakun ih nogi baino diti momuu’an laan Upko Limbanak.
Tanak totuvo di Poniikon Institut Ponoizukan Kotundaan (IDS) Sabah om puu pulitik nointutunan id Penampang, Datuk Seri Dr Clarence Bongkos Malakun dino minanaak foom dino nokomoi kumaa Pemangku Presiden Upko Datuk Seri Panglima Madius Tangau, id abaabazan pinonguhudan mahik laan Upko Kampung Limbanak, di tadau Koonom nakatahib.
Minanaak bobooson id abaabazan dino, minoboos zi Ceaser do kinotontuan dau montok monoimo tonggungan momuu’an laan Upko Kampung Limbanak okon montok dumadi puu pulitik, katapi montok poposodia do kopomuu’anan sabaagi lahan tavasi montok manaak kotoinaan kumaa tuhun ngavi om pogun Sabah.
“Piahatan iman-imanon ku nopo nga montok dumadi buu’an mooi obuli tokou manaak kotoinaan doid tuhun ngavi. Okon saavi-avi tuhun obuli dumadi puu pulitik, katapi saaviavi tuhun obuli dumadi buu’an,” ka disido.
Minoboos zi Ceaser do sabaagi tanak sandad Kampung Limbanak, mimang isido popotihombus do tinongkizadan padamaan mohoing kusai (tama) om taki dau ih pinopotongkizad do hahansanon doid mogiigizon kampung dino nokomoi om nogi Penampang.
“Tiagak ‘datuk’ ku, KK Bongkos Malakun pinopotongkizad do hahansanon doiti sundung pia nadadi momumutanom poompus koposizon dau.
“Isido tomoimo mimang mogiigizon kampung diti kivaa koposizon di tavasi, om piahatan kinahantazan dau ih kopongunsikou nga pinanadaan klinik kohidasan, gereja, sikul tosiibo om sikul pintangaan. Iti nopo nga Limbanak, iti nopo nga Penampang,” ka disido.
Namot dino, Monunuat Tagazo ih nogi Huguan Boogizan Upko Penampang Datuk Donald Peter Mojuntin minoboos do kivaa 300 puu hoohobi mantad sukod tomuhok ih suminuang Upko nopo nga iso kinamanangan doid parti.
“Iti sabap kinoimbuhazan Upko okon noopo montok timpu diti katapi tomoimo kivaa om sohihinaid montok sinakagon timpu mikot,” ka disido.
“Sabaagi huguan boogizan Upko montok momuu’an sabap buu’an vanan posodia kivaa montok touvi tadau kopinsin om manaak lahan kumaa sukod tomuhok montok monovohi kopomuu’anan parti,” ka disido.
Minoboos zi Donald do pinonguhudan mahik boogizan Upko Limbanak ih baino diti binuu’an di Ceaser nopo nga iso haang montok papavakas vagu koikonon parti dino id uvang diti.
Nokotindapou nogi ih bagas Luyal Pogun Tan Sri Herman Luping, Huguan Koonduan Upko Datin Dr Jaina Sintian, Huguan Komuhakan Upko Penampang Carl Mosoom om Dr Clarence Bongkos Malakun.