Kusai natagak ontok pinapaatod barang doid bot kumpit

KUDAT: Songulun kusai kiumur 20 toun pinoruput do natagak om kikorosian do nolonod kalapas bot ih sinakaian binobog umbak id Kawaigan Dogoton Pulau Banggi hiti di tadau Kaapat nakatalib.

Munggui nointutunan sabaagi Samrie Santalia nokitonan minamakai raus ‘ T’ kiwarana otoou om oitom om kisorual tanaru ontok kinantakan kiikira jam 7.15 sosodopon di ontok 19 Januari nakatalib.

Kumoduo Potunud Operasi Watas Maritim Sabah om Labuan Kapten ( M) Rahim Razali minoboros do ontok kinantakan munggui om songulun kagu tambalut dau suminakai bot montok papaatod barang.

“Munggui om tambalut dau ih suminakai bot kawo kayu kiwarana opurak kininaru kiikira 15 kaki om apat meter linaab minomoguno injin 18hp id pindalanan montok papaatod barangan lotirik kumaa doid iso bot kumpit.

“Soira nokorikot id tampat kinantakan tigog do bot ih sinakaian binobog umbak tagayo pogului bot diolo notorob,” ka dau.

Minoboros isio do tambalut munggui minaganu laang montok manampasi munggui poingkuro poh nga koyuon daat di kihakun minangantob laang dau natadon do munggui natagak nowit waig tosolog.

Kawagu dau, montok manampasi tinan tambalut munggui mininggisom montok kapaganu do ponulungan miampai luminoyog gisom nokorikot doid bot kumpit.

“Soira nopo nokotorimo ruputan kinantakan dilo, karaja Mogium om Manampasi (SAR) suminikap pinapanau om Bot Mintamong 44 sinuhu minoi id tampat kinantakan pogului nokoilo tampat tototopot kinantakan.

“Ontok sinoromo, tambalut munggui monondos munggui au minamakai jaket koumoligan au nogi koilo lumoyog munggui dilo,” ka dau.

Minoboros isio do aset idsuang SAR diti kaamung noh bol Adal 04 sanganu Agensi Popogirotkuasa Maritim Malaysia (Maritim Malaysia), PSC 64 mantad Tinimungan Pulis Marin ( PPM) om 16 mogigion om piipiro bot uminampai nogi ontok pinapanau karaja mogium dilo.

Namot dilo id ningkokoton misusuai iso bot kawo ML Nurliana pinoruput id koyuon oruhai noh notorob kalapas nakalanggar watu id PU Langkayan id pompod kawaigan Kudat pakaayan doid kawaigan Sandakan.

“Bot ih haro 10 krew om minogowit taakanon agaan dilo id pindalanan mantad Labuan pakaayan doid Bongao Filipina pogului nantaban id korikohonon kiikira 10 batu nautika timur daat Pulau Malawali,” ka dau.

Minoboros isio do minonuhu o bogian dau do Kapal Maritim (KM) Libaran om Bot Adal 04 montok monulung manampasi koinsanai kru bot dilo.

“Bot Adal 04 nakaanu mininsomok bot dilo om koyuon bot nosuangan noh waig om oruhai noh otorob om nouhung id sawat terumbu karang.

“Puru tokou kalapas diri minanampasi munggui om koinsanai kru bot rayat Filipina ih kiharo id suang kapal pinoruput id koyuon noumolig om aiso kinosindualan suai pinoruput,” ka dau mikuo minanamba do puru dau kotoguang rasam tasapou om aun akapal ontok pinapanau karaja manampasi.