Gunoon tososonong PNS
ngawi Ranau doulu noh tinimungan susumikul pokionuon mooi kopomoguno miampai tososonong kinoponuridongan Panambasaan Buuk Pogun (PNS) raan watas dilo, sabaagi tiyonon kapaganuan do toilalaan kawawagu maya pambasaan.
Ponulung Pustakawan PNS raan Ranau, Alwin Aslin, 30, minomisunud do gaab pinonuridongan oanambasaan buuk pogun nopo nga montok popoingkawas do rontob kosonongon koposion om nogi kaanu poposoribau do tulun ngawi kitoilalaan maya do kopongubasanan mambasa ih nogi pialatan ahal idsuang kaganaan Kapangasilan Tagayo toiko KRA Komontirian Kotundaan Mogigion.
Pinosusui di Alwin do kinoponuridongan PNS Raan Ranau mantad podi 1960-an ih pobului diti nokoundaliu noh doid limo tiyonon gisom do pinoiyon doid linominon sondiri ontok 22 Julai 2008 id tapak kalaabon kiikira 2 ekar poingoros SESB Bogian Ranau om Masjid Jamek kakadaian Ranau.
Ontok diri ka dau, pinopoiyon do 11,722 koleksi buuk miampai 27,350 tulun Mogolos Buuk om nokoonurat kiginumu 63,604 tulun tulun nokorikot om kopuruan diolo nokorikot 2,199 tulun.
Piagalon toun 2015 nokoponurat kinoruhangan ginumu koleksi buuk kumaa 66,418 tinan kapaamung do Koleksi Buuk 63,848 tinan om Koleksi Majalah 2,570 tinan.
“Mantad podi Januari gisom Disember 2016 nopo nga, nokoponurat yahai kiginumu 23,914 tombului nokorikot, 2,130 tinan Koleksi Sumber Media om koporuan totopot nopo nga kiginumu 3,084 tulun,” ka di Alwin mikuo minanamba do ginumu koinsasanai buuk ontok 2016 kakaal id kopoindalanan kopongitoban.
Pinongintongan media doid PNS Ranau koniab, nokoilo do ogumu tombului nokorikot doulu noh susumikul pintangaan om pakakaraja ngawi porinta om misosondiri korikot momoguno do mogisusuai koleksi buuk doulu noh buuk ngawi pongintongan montok gunoon id pambalajaran diolo.
Kiharo mogisusuai kounalan, kaamung noh sio Dewan Seminar, Linimput Pitimbungakan, Kaunter Pamagalasan & Kopomogulian Buuk, Linimput tiyonon Solat, Linimput pogibabarasan, Linimput ‘ Happy Media’ Sudut Koumatan ICT (ECorner), Liwang Mambasa montok Tangaanak, Upis Kotorinaan om iso Bas Panambasaan Buuk Pogun Mabpanau.
Id labus linominon (natad) PNS Raan dilo, nogi nga koborisian, kolumison om koumoligan montok rumikot ngawi.
Namot dilo, ogumu tombului di nosiwatan ruminumoh, mangatag do mooi PNS raan Ranau poposodia do PNS Raan Tawau poposodia do iso kantin montok kounalan tulun ngawi di korikot doulu noh susumikul ngawi ih mongoi id panambasaan buuk pogun katapi au nokosiwat minuli walai montok makan/minum tangadau toiko sosodopon.
“Koposodiaan linominon kantin kiguno kopio montok kounalan susumikul pogului mongoi sikul,” ka di tadik Nor Asikin Binti Japilin @ Saji Sawin, 17, Tingkatan 5 mantad SMK Lohan.
Namot dilo, Panakadai Panambasaan Buuk Pogun dilo mantad pogi 1977 om pialatan 9 pakakaraja di nakakaraja noh id PNS dilo mantad podi 1977 om pialatan siam pakakaraja ih kakaal pakaraja id panambasaan buuk dilo, minongomi do panambasaan buuk sabaagi ‘Gedung Ilmu’ montok kapaganu do mogisusuai koleksi pisuk toilalaan tosonong om kiguno kaamung noh kololoisan om kapangasilan asil kaakmot kapalabusan (produk) maya buuk pongintongan di obuli gunoon id kopoposion tikid tadau.