# 14 ‘menara telekomunikasi’ mangan turidongo id watas tokoodo Kemabong - Salleh
TENOM: Opod om apat linominon takawas piturubungan (telekomunikasi) mangan turidongo id watas tokoodo Kemabong, kiikira 31 kilometer mantad kakadaian Tenom, montok popoingkawas do kodimpotan bondira Malaysia (Jalur Gemilang) id watas dilo, ka di Montiri Piturubungan om Kapaabaran Datuk Seri Dr Salleh Said Keruak.
Minoboros isio do kaakun o komontirian montok popolulus do poruntukan momonsoi bogian linominon takawas piturubungan dilo sabaagi pomoruhangan kumaa onom linominon posodia haro id watas dilo.
“Pisosoromo 14 bogian linominon takawas dilo au poh kabagal montok kogunoon id pointongkop Kemabong. Mantad dilo manahak oku timpu solinaid duo minggu kumaa Upisor Watas mogiboboros miampai Suruhanjaya Komunikasi om Multimedia Malaysia (SKMM) Sabah kokomoi ginumu tototopot linominon takawas ‘telekomunikasi’ ih pokigunoon id pointongkop watas Kemabong,” ka disio.
Noboros disio ahal dilo ontok minanahak boboroson pinotimpuun do Abaabayan Popiromut Popisompuru om Dashboard Komuniti om Kopongindapuan (DAKU) Kemabong hiti, koniab ih notindapou di lobi 7,000 mogigion id watas dilo.
Nokotindapou nogi ih Puru Parlimen Tenom Datuk Raime Unggi om Puru Lamin Koundangan Pogun Kemabong Datuk Rubin Balang.
Minoboros ih Salleh do kapamansaian linominon takawas dilo kotopong miampai kopokionuon rayat id watas Kemabong doulu noh iyolo ih poingiyon id watas labus kakadaian.
“Potontuon tokou id toinsanan watas Kemabong kapaganu do kounalan ‘jalur lebar’ om kopuriman do pomogunan internet. Potontuon do porinta o ‘infrastruktur internet’ kaanu poposodia kumaa rayat id toinsanan watas kaamung id bogian sokid.
“Mokiririkot o porinta do ontok toun 2020, 95 paratus watas id pogun diti kaanu mamalapus do ‘internet’ om osiliu tonggungan ku sabaagi montiri kitonggungan manalasai do kobolingkangan rayat kikoompitan kopodimpotan internet,” ka disio.
Namot dilo, noboros di Salleh do Luguan Montiri Datuk Seri Najib Tun Razak kaakun do popoobi do RM1 riong sabaagi koponulungan kumaa gereja id pointongko watas Tenom om Kemabong.
“Luguan montiri tokou nopo nga momuruan tumilombus kumaraja montok rayat om isio (Najib) au insan monolikud koinsanai rayat id Malaysia,” ka disio.
Minongomi kokomoi abaabayan dilo, noboros di Salleh do abaabayan Popiromut Popisompuru nopo nga laang tosonong kawawagu porinta montok papanau do mogisusuai abaabayan montok momodimpot ‘wawasan’ pogun miampai pisokodungan mogisusuai agensi porinta om komponi misosondiri id siriba ‘Strategi Lautan Biru Kebangsaan’.Bernama