Sabap do minongorumpak, sumukod kusai tinahan pulis
SANDAKAN: Pulis minanahan songulun sumukod kusai kiumur 17 toun kikotumbayaan do nokohompit idsuang kes mongorumpak kisinjata nokomoi songulun pakakaraja tulun ginumuan tondu ontok monguyat tinan (berjoging).
Boyoon Pulis Watas Asisten Komisioner Mohd Azhar Hamin minoboros do ‘suspek’ tinahan di sontimungan pulis mantad Koupisan Ponoriukan Jinayah (JSJ) di ontok 20 Februari nakatalib kiikira jam 3.30 sosodopon id iso lamin aiso numbur, tingkat suriba, tohuri iso setesen tumau id Batu 2.5 Ralan Utara, hiti.
Noboros disio do nahau nogi mantad ‘suspek’ dilo nga iso talipaun piowit-owit Samsung, iso beg tusin, buuk bank, lesen papanau, kad susumikul, kad Tupperware, kad Green Genting Mass Mall, duo kad Master, duo kad ATM, kad Sandakan Yacht Club, kad Student Popular, kad Titanium Peace of Mind om memori kad J/Sandisk Ultra 8GB.
Ka dau sumusuhut kinantakan dilo, pinoporuput kiumur 44 toun nakakandai kinorugian kiginumu RM2,500.
Minoboros Azhar do ontok 7 Februari kiikira jam 3.35 sosodopon, pinoporuput miampai sawo dau nokorikot id apartmen Batu 2 mantad lamin suminakai korita, om soira nokorikot sawo pinoporuput pinapaking do kurita id tampat pundorongan padsakaian id bogian apartmen dilo.
“Kalapas sawo pinoporuput pinapaking kurita, om luminintuhun iyolo montok ‘berjoging’ tumanud wayaan talun alun gisom doid Trig Hill. Ontok timpu diri, pinoporuput mamanau om sawo dau kiharo id tigulu.
“Kiikira jam 3.45 sosodopon ontok pinoporuput mamanau id bogian pintangaan pialatan apartmen om Trig Hill, iso motosikal ih sinakaian duo tulun kusai (suspek) ruminikot mantad tohuri om tinoliban pinoporuput. Ontok timpu diri, sawo pinoporuput kiharo osodu id tigulu om au kaanu mongintong om nogi nga korikohonon di pinoporuput ontok diri id bogian poinkilong,” ka dau.
Haro piipio minit kalapas dilo, ka dau, motosikal ih sinakaian ‘suspek’ guminuli kagu om minundorong id toguang pinoporuput kosoduo kiikira 3 meter. Soira minundorong motosikal dilo, korikot songulun ‘suspek’ miampai minamakai topi keledar om kiraus T warna aragang minidahu. Suspek nopo nga tuminapi om songulun tambalut dau kakaal kiharo id sakai motosikal.
Minoboros Azhar do suspek kalapas diri turus pinapakakang sawatang kakamot atarom, au oilaan di pinoporuput do pais nangku toiko kayu miampai minokianu pinoporuput do papatahak do ‘beg dompet’ ih nowit dau, om ontok diri pinoporuput dino id koyuon natagakan pomusarahan (panik) om poingkadaada sabap orosian.
Tumanud dau, suspek ruminikot id ponong pinoruput om suminindikot minamagayat beg dompet ih kiharo id longon pinoporuput hinonggo kinantakan migagayat nantakan gisom natadon do tali beg dompet pinoporuput noputut.
“Ontok timpu kinantakan, au minomogiak pinoporuput dilo sabap id koyuon orosian om aiso tulun ih mintalib toiko mintangkus id koiyonon dilo, om korikohonon sawo pinoporuput nopo nga osodu. Kalapas minamarampas beg dompet pinoporuput, turus minogidu suspek dilo miampai tambalut dau miampai suminakai motosikal,” ka dau.
Poingkuro poh nga, ka dau, au nointutunan di pinoporuput o warna, kawo om numbur koporijistaran motosikal dilo sabap ontok timpu diri natagakan pomusarahan om id koyuon orosian. Kalapas goduo-duo suspek minogidu, turus minomogiak ih pinoporuput mokianu ponulungan om kalapas diri sawo pinoporuput nokorikot id koyuon miagabagab.
Minoboros Azhar do pinoporuput aiso nunuunu nosindualan om au nokopongintutun suspek sabap natagakan pomusarahan (panik) id kinantakan dilo.
Minoboros isio do ‘suspek’ baino diti tinahan montok ponoriukan tumanud Seksyen 395/397 Kanun Koinggoritan.
Kawagu dau ‘suspek’ nogi haro rikud kasalaan laid, sabap kasalaan dadah tumanud Seksyen 15 (1) Akta Dadah Koligogon 1952, om manakau tumanud Seksyen 379 Kanun Koinggoritan.