Lamin ‘setinggan’ nuyas DBKK

# Kiginumu 10 lamin winonsoi id tana sanganu porinta om aiso lesen nuyas ontok pinapanau karaja ponguyasan id Kg Kibagu, Manggatal

KOTA KINABALU: Dewan Bandaraya Kota Kinabalu (DBKK) minonguyas do 10 lamin tolosok (setinggan) ih kikotumbayaan do winonsoi id bogian tana sanganu porinta ontok pinapanau karaja (operasi) ponguyasan id Kampung Kibagu Manggatal, hiti koniab.

Panakadai Montiri Popogirotkuasa DBKK, Inspektor Mohd Romzi Musa minoboros do nakapanahak noh bogian dau do surat koponguyasan ontok 11 om 12 Januari nakatalib, poingkuro poh nga mogigion au tuminanud do pinonuhuan di pinatahak pogului minaganu laang koponguyasan pinapanau.

“Nakapanahak tokou noh do kiginumu 12 notis tuh aiso nodi miyon id 12 lamin dilo, nga okito tokou aiso nunuunu laang potilombus ih winonsoi di mogigion nokohompit.

“DBKK miampai nuhupan do piipiro agensi dino nokomoi kalapas dilo pinapanau do koponguyasan 10 lamin baino diti (koniab) om kakaal tokou magandad korikohonon tana nokomoi noolu duo lamin di au poh nuyas,” ka dau id pitimbungakan abar id tampat kinantakan koniab.

Minoboros isio do papanau karaja (operasi) koponguyasan dilo kopohompit do 29 mogigion mantad siam boyoon lamin om tolu kagu tulun suai noilaan sabaagi modidikot aiso kasagaan (PTI).

“Pinomorisaan di pinapanau nogi nokoilo do kogumuan mogigion minomonsoi lamin di au nakaanu kasagaan id tana sanganu porinta om aiso garan tana mantad podi 10 toun nakatalib.

“Sinunudan o DBKK do mogigion haro minomonsoi pokiinsianan miampai boros noopo (au pinosurat) id tampat kinantakan, poingkuro poh nga ‘notis’ koponguyasan nakalabus noh om sansagan tokou tuminanud do ponuhuan di pinalabus do bogian kawas,” ka dau.

Ka dau papanau karaja dilo pinoburu di 13 puru mantad DBKK om piipiro agensi suai kaamung noh Pulis Diraja Malaysia (PDRM), Koupisan Kolidasan Posorili Kakadaian Tagayo, Sabah Electricity Sdn Bhd (SESB), Koupisan Waig Pogun Sabah om Koupisan Tana om Monukat.

Minoboros ih Romzi do idsuang timpu Januari gisom Februari toun diti, nokoponguyas noh DBKK do kiikira 20 tinan lamin ‘setinggan’ id duo ‘operasi’ misusuai kaamung papanau karaja koponguyasan id Ralan Pinggir 1 om 2 di ontok 18 Januari nakatalib.

Papanaon do bogian dau ‘operasi’ irad dilo ontok timpu tabantalan montok mongipop pongiyanan ‘setinggan’ id bogian tana sanganu porinta.

Puru DBKK pinapanau do karaja monguyas lamin tolosok id Kampung Kibagu, Manggatal koniab.

Okitonan bordoza monguyas lamin tolosok (setinggan) ontok pinapanau karaja koponguyasan id Kampung Kibagu, Manggatal.