Umno Silam tumaru papatantu tolu tirikohon DUN kotilombus id suriba BN
LAHAD DATU: Umno Bogian Silam tumaru papatantu do tolu tirikohon Lamin Koundangan Pogun (DUN) ilo nopo nga Kunak, Lahad Datu om Tunku om iso bogian Parlimen (Silam) kotilombus id suriba pomorintaan Barisan Nasional (BN) ontok pomilian tagayo timpu rumikot.
Boyoon dau Datuk Muhammad Yusof Apdal minoboros do tumanud do kooyuon insan timpu kotumboyo isio do BN ih ginomutan Umno kamanang doti toinsanan tirikohon id bogian Silam.
Noboros disio ahal dilo kalapas ruminamit kakapan Komiti Poimbida Tinan Piturubungan Umno Sabah ih linuguanan di Luguan Kopoilaan Tinan Piturubungan Umno Sabah, Datuk Sapawi Ahmad doid Umno Bogian Silam id Lahad Datu, koniab.
Nokotindapou nogi ih Montiri Komulakan om Sipoot ih nogi Luguan Umno Bogian Tawau, Datuk Tawfiq Abu Bakar Titingan, Monunurat Eksekutif Tinan Piturubungan Umno Sabah Datuk Kadzim Yahya, Luguan Koonduan Silam, Mizma Appehdullah om Luguan Puteri Umno Silam Zuraidah Asdain.
Poingkuro poh nga, montok papatantu do gaab dilo osigampot, isio ih nogi Adun Lahad Datu kikalansanan do kopoilaan ih pinosodia nopo nga koontok om au awagat sampaping montok papatantu diolo mamalantoi koinsanai tirikohon ih ponokisaapon ontok pomilian tagayo timpu rumikot.
“Opurimanan ku, nokosodia tokou noh mantad podi kalapas pomilian tagayo nakatalib om okon kitimpu, baino mongulud tokou koposodiaan noopo montok tumoguang do pomilian tagayo, katapi sokodung om kotumbayanan rayat id bogian Silam diti kakaal kiharo id rontob di akawas montok monokodung BN,” ka disio.
Id timpu iso’i, monongkotoluod ih Yusof kumaa Tinan Piturubungan Umno Sabah ih minanahak do ponodokan pomusarahan (idea) montok mongulud kagu koposodiaan Umno Silam montok tumoguang do pomilian tagayo.
Namot dilo, nasantaban ginawo di Sapawi miampai koposodiaan injin pomilian tagayo Umno Zon 6 ih kaampai mantad Umno Kalabakan Tawau, Semporna om Silam kalapas pinapaharo do kakapan doid bogian dilo.
Ka disio sunduan kapamanaan karaja om koposompuruan nakaanu pinopokito do poompus kinakapal dilo om manahak kotumbayanan do Umno Zon 6 nokosodia noh tumoguang do pomilian tagayo ontok soira-ira timpu noopo.
Tumanud disio, kakapan dilo nopo nga montok mongilo do ahal ngawi id bogian sompori-pori om koposodiaan injin pomilian tagayo potitikid bogian montok tumoguang do pomilian tagayo timpu rumikot.