Pamahaavan manakadai sikul maganu kahantazan
Monunuat pulitik kumaa do Montili Tekoloji Totomou om Vaig, Datuk Daniel Kinsik minomohou do mohoing do manakadai kotoinaan do sikul do maganu kahantazan id balajalan.
“Mohoing apatut do mongkimamaa do manaak balajalan tavasi kumaa do tanak dioho, hoohobi id daamin,” ka disido ontok minogukab do mitingan tagazo tounan (AGM) do Koisaan Mohoing-Mongingia (PTA) do St Francis Xavier doiti dii kavavagu.
Daniel minoboos do kopolintaan tomoimo mogium lahan tavasi do manakadai do sikul, hoohobi sikul ngaavi i okon ko poinponu sakadazon kopolintaan, do gumazo id kotundaan.
Ontok AGM dii, Daniel nga minanaak LCD gunoon montok pongiaan id sikul.
Poguhu i ponikoon do gounal kotinanan sikul, minoboos do PTA om gounal kotinanan sikul apatut do mogisasakadai momiukut usin do monoodo iso hamin kavavagi sikul i kihoogo solizong linggit.
Minokisakadai isido do ginumuan, hoohobi i bagas susumikul do manaak sakadai kumaa doid sikul naait.
“Sikul diti nokopomohodi ogumu tuhun tangabaa toi professional id nokosikul dotii. Otumbazaan zou do songian izioho koiho do tuduvon dagai tohidang, mikot izioho do manaak sakadai,” ka disido.
Montok do tuduvon diti, ka dii Daniel, iso komiti poimbida todoon do mogium do bagas susumikul om popoiho dioho do abaabazan kotundaan do sikul id timpu toduuk.
Ka disido gounal kotinanan sikul nga ahansan do kotimpuun popotuidong do hamin kavavagu toun diti sundung potuu okuangan do kousinan.
Naamot, huguan sikul, Helena Edrin minonongokotohuod do kinotindapaan do mohoing ngaavi id AGM naaiti nokohobi mantad dii pitimbungakan nakatahib.
Ka dosido mohoing nga mihoiho nodii do tonggungan dioho kumaa do sikul do manakadai tanak dioho maganu kahantazan id balajalan.
“Mimang tokou do sikul dotokou i iso tavasi no kozo id uvang diti. Kinahantazan do sikul diti id piboian mimbuul montok zon municipal dii kavavagu naazu id SK Patikang Laut no iso poombitanan do kaanu tokou kahantazan id mogikakavo kaganaan. Sundung potuu do sikul diti aiso tana tohivang pamainan buul, avasi nogi o naangazan dotokou,” ka dosido.
Nokotindapou nogi i ponikoon PTA, Gilbert Timun, Augustine Nain, puu gounal kotinanan sikul , komiti PTA, mongingia om mohoing tanak sikul.