Sipoot popoinsavat ngaan pogun, ka dii Hussein
KOTA MARUDU: Kumoduvo huguan Umno boogzian Kota Marudu Dato’ Hussein Oyong minoboos kahantazan akademik om kokorikulum mositi timpuduon hohoobi id nazatan sikul tosiibo.
Ka disido montok do piatusan kahantazan mositi kivao pisakadazan mantad mongingia, mohoing om susumikul.
Ka disido, maza pinghudaan pomusaavan om spiritual dii mononongkibaai nga kaanu do sunduvan obonongkibaai om miampai kohidasan do susumikul dii tomoimo asanang mamalati toihaan i kobuu id timpu mazuazu.
Ka vagu disido susumikul id sikul kabansaan nga unsubon do momoguno pomusaavan tohidas om vookon dii kounsub dioho nga maza do sipoot. Hussein ponoogi ponikoon Koisaan Bangsa Bajau Sama Kota Marudu minoboos diti id Abaabazan Sipoot Sikul Zon MSS 2, id tana tohivang SK Taripan doiti dii kavavagu.
Poguhu i huguan mongingia SK Taritpan om isido ponoogi ponikoon mangazu MSS Zon 2 2017, Asirul Haji Hama minoboos, kaganaan sipoot monoodo susumikul opusik om tumanud miampai kootulan, kitonggungan, kivao disiplin om nogi kipomuanan.
Id piboian dii, SK Tandek nakaanu himo midol amas, apat piok om tohu tambaga. Id Tampat koduvo SK Tumunda Salimandut miampai midol himo amas, tohu piok om iso tambaga. Om id tampat kotohu nopo nga SK Taritipan miampai tohu midol amas, duvo piok om tohu tambaga. Id tampat kaapat SK Samparita nakaanu midol duvo amas, iso piok om himo tambaga. SK Tanjung batu nakaanu midol iso amas, apat piok om tohu tambaga. SK Masalog nakaanu midol duvo piok om duvo tambaga. Om SK Koromoko nakaanu iso no midol tambaga.
Noktoindapou nogi id panakadai upisol totuo SK Taritipan, Lee Tong Kip, Rosmah Ismail, Abdul Jalil Madarin om mononoina MSS Zon 2, SK Taritpan.