Midoodout tosoou

SOMOONU kivaa dotokou do koongou do kivaa tuhun moboos: “Nookuo’ zou ma do baino tu oniibo o todop ku; obimposik zou nogi nodii; monguni o bolitotok nga oposik zou nodii; om noposikan zou nopo nga au zou nodii koodop gisom osuvaban.”

Nung uoton dotokou ii tuhun do: “Mantad di songian ko po do ingkaa; songkuo no hinaid?” Kivaa mai sumimba do, “ahaahaid nodii bo iti dii; nga ‘tinanda’ no do kiumul-umul, ka dii totuutuo duuhia. Tou nung otopot ko au.’

Koiho tokou do kiguno o todop poinggonop. Pio jaam o todop poinggonop? Tumanud toi mozo nogi do umul do tosoosonguhun: montok topodo, buvazoi, tanak vagu, tanga-uhun, nohoing. Nung koiho do mambasa dii buuk do kohidasan, nga kivaa mai tutuduk om simba montok do ‘songkuo hinaid (jaam) do todop poinggonop montok om tumanud do umul.

Nga sundung potuu do koiho, nga hobi no vinasi do ‘mongoi tuubung’ do dokutul, tu ‘soizukon’ po mai do dokutul - ogumu ponguot om tudizo dioho; om monontuduk nodii mai izioho do ‘nunu o maan’; om manaak nogi mai do tubat (usap).

Nga nung soosondii do mongiho do nunu kozo o sabap tu au koodop toi oniibo nopo o todop, nga soosondii nogi mai do koiho do nunu kozo o tinimpuunon do au koodop, toi oindamaan kozo do obimposik om au nodii kaanu modop. Kivaa mai dii oitan do ‘noumbat’ ii oitan do’sleep pattern’; toi kivaa mai sabap suvai monoso, moguang, kikoosi... om ogumu po suvai sabap.

Nga nung koiho sondii do mogium do sabap ngaavi do au koodop... nga kivaa nogi mai tuhun do koiho do ingkuo mongidu dii ontoonon do au koodop. Ogumu lahan moingidu dii; iso nopo dii piipio lahan mongidu dii nga ‘sumambayang (monongkiboos di Kinoingan)’; ‘Oi Kinoingan, ii abantug, voovozoon, songkuasa do vinangun ngaavi nu...; mokiinsian zou diau, mokihiong zou diau do komungkangan om kokuangan ngaavi ku Monongkutohuod zou diau do sabah no dii taak ngaavi nu dogo do mantad po dii tinimpuunon ku. Mokiinsian zou diau do mongidu diti koompukang ngaavi dogo; moguang zou, mosi-osi zou; au zou kaanu mongidu do kohohodong ku di ‘kuvo’, au zou kaanu momohiiu do kababaazat ku di ‘kuvo’, om itia ngaavi po, oi Kinoingan:..

“Noosizan zou do nokoongou do ‘kivaa kaaka do tontohu do tuhun’, do kivaa talaat nokohoput, do kivaa ‘guminuzu-tana’, do oindamaan o hizud duuhia om doihuu, do oindamaan magadau doihuu om duuhia, do nakapagon o hoogo dihia om itia boobohizon. Nga nokoiho ko bo diti suang ngaavi do ginavo ku, oi Kinoingan. Mokiinsian zou diau: iduo no iti katatahou ngaavi ku; om mokiinsian zou iau do ‘iduo om potoodo’ no iho papatahou ngaavi dogo. Onuai zou no do vinakas do ginavo. Oguno ku no daa tavaavasi o timpu tanavau om timpu totuvong (tadau om sodop); om ogonop nodii ii todop migonop montok dogo do id diti umulan ku Balakatai zou no; avasi om ogonop mai o todop ku; om ohigkang zou mai do oposik zou po; om ogumu mai o taangazan ku do monuhuk dii hizab ngaavi nu, do suvab.. Amen.”

Iho nopo nga sambayang poomitanan noopo; mogisuusuvai mai o ontodonon om sabap do au koodop. Poingongou om pointamong tomoimo dotokou i Kinoingan. Tomoimo manaak dotokou. Ii dokutul nga dinadi Disido do dokutul tu montok no dotokou. Tutuduk om usap di dokutul nga pongidu nogi dii katatahob ngaavi do todop poinggonop. Kada pohoido ii timpu ‘au-koodop’!