Mongunsikou ponuli kosianan Ramadan: Sapawi
SIPITANG: Angatan di Puru Parlimen Sipitang Datuk Sapawi Ahmad o rayat mooi kopongunsikou do ponuli kosianan Ramadan ih popomilo ino royohon di tulun ngawi Silam id koyuon di otoonong om olumaag songowian rayat mogisusuai tinaru om kotumbayanan.
Idsuang ahal dilo, muhang isio mooi do sunduan Ramadan dilo ih kopoompit do ahal pisompuruan, koupusan, balajaran om ekonomi do poomungon om om pogiroton miampai kotilombus gisom kalapas Ramadan.
Ka disio rayat pogun diti kinasib sabap kaanu mamaramit Ramadan om kalapas dilo mamaramai do Aidilfitri id koyuon olumaag sumusuhut haro kosompuruan rayat di pinogirot miampai kaandangan porinta.
Ramadan nogi mogowit rezeki ekonomi sabap nosiliu impoon poniagaan montok tulun ngawi Silam maya bazar ih pinaharo id nonggo noopo.
“Bazar Ramadan kopoingkawas konuonuan tulun ngawi Silam, momomoli diolo kaamung noh toinsanan tinaru kaamung okon Silam, om ilo nogi osiliu asil kakamot kapalabusan ponombuluian di osiliu pamagayatan tutumombului ngawi labus,” ka disio.
Noboros disio ahal dilo ontok minanahak boboroson id ‘Program Ihya Ramadan’ pinajur do Tinan Puteri Islam Malaysia (PPIM)Piturubungan Pogun Sabah id Dewan Masyarakat Sipitang, hiti, koniab.
Abaabayan pinalantoi songowian miampai Yayasan Sabah, Upis Balajaran Watas Sipitang, Biro Agama Umno Bogian Sipitang, Tinan Dakwah Watas Sipitang, Koupisan Ahal Agama Silam Pogun Sabah (Jheains) Sipitang, Tabung Tanak Aiso Molohing Kakadaian Sipitang om Bendahari Umno Sipitang Datuk Ir Mustapa Hj Kassim.
Kopinamot abaabayan dilo, kiikira 400 tanak aiso molohing, susumikul okurang kamampuan om tinimungan ‘asnaf’ nokotorimo toluod somporipori.
Nokotindapou nogi ih Ponorikohon PPIM Piturubungan Pogun Sabah Datin Patimah Hj Ali, Puru Lamin Koundangan Sindumin Datuk Ahmad Bujang, Boyoon Komulakan Umno Sipitang Yamani Hafez Musa, Boyoon Koonduan Umno Sipitang Datuk Surinam Sadikun, Boyoon Puteri Umno Sipitang Suzie Hamat om Upisor Balajaran Watas Sipitang Abd Razak Abd Karim.
Sapawi ih nogi Potunud Yayasan Sabah minoboros do mogisusuai tinaru id pogun diti au kapangantob montok mogiwowoyo ngawi momurimon do aramai kopio Ramadan, mantad dilo ilo kangaam kopio potilombuson miampai sogiigisom.
Ka disio kosompuruan om pisaan id pialatan rayat nopo nga ponokotanda montok koburuon pogun (Sabah) om pogun Malaysia) koinsasanai.
“Kanou noh poomungo tokou o rusod om sunduan Ramadan diti montok koburuon tumanud do ralan pisaan, koupusan, balajaran om ekonomi, sundung pia kalapas opupusan o timpu Ramadan,” ka disio.
Kokomoi kotundaan Sipitang, Sapawi ih nogi Boyoon Umno Bogian Sipitang minoboros do ‘agenda transformasi’ kotundaan baino diti nakapanau tososonong om pisosoomo ‘landskap’ koburuon kaanu mongintong idsuang timpu limo toun.
Ka disio baino diti projek Talun Alun Tagayo Pan Borneo om projik tumau om gas nopo nga projk tagayo ih poinsodia monimban wuros Sipitang, sabap goduo-duo projik dilo popoluub kosunion ekonomi tagayo kopio.
“Minggisom o porinta mogowit ponimbanan montok rayat koinsasanai, katanud gaab momuruan montok popolumaag do rayat,” ka di Sapawi.