Duo mianak-anak nagakom pulis, dadah kiwinagat 3,080 gram nahau
LAHAD DATU: Pulis minanaan duo mianak-anak tulun songkosuaian om minamagahau dadah kikotumbayaan kawo syabu kiwinagat 3.080 gram miampai anggaran gatang RM225,000 maya ‘Ops Sarang Bersepadu’ ih minanahak pongintongan poimponu id bogian Kampung Puyut, hiti di tadau Koonom nakatalib.
Boyoon Pulis Watas Lahad Datu ACP Hamzah Ahmad id iso pitimbungakan abar id IPD LDU koniab minoboros do pasangan tina om tanak kusai somporipori kiumur 52 om 19 toun dilo tinaan id suang iso lamin aiso numbur kiikira jam 5 minsusuab di sontimungan upisor om puru Bogian Ponoriukan Jinayah Narkotik (JSJN) ih kopoompit nogi mogisusuai koupisan, raan om agensi porinta suai.
Ka dau asil pinonugkuan om pinomorisaan id suang lamin dilo, nokokito o pulis do iso kantung warana oitom nosuratan ‘Convers All Star’ ih pinoopi id bogian tohuri linimput.
“Asil pinomorisaan, id suang dilo nokokito tokou do kiginumu duo paket plastik nosuratan ‘alishan jin xuan tea’ hinonggo potitikid iso kisuang bakaang oniting kikotumbayaan dadah kawo syabu miampai anggaran winagat 2,060 gram, om iso plastik kiwarna oitom id uang plastik dilo kiharo iso paket plastik kisuang bakaang oniting kikotumbayaan dadah kawo syabu kiwinagat 1,020 gram, om koinsasanai pinamahauan kiwinagat 3,080 gram miampai anggaran gatang RM225 noribu.
“Nahau nogi, tolu gulung popodokot warna coklat kisuratan ‘Global’, iso paket plastik anawau kisuang piipiro paket plastik, iso bagas warna oitom id suang dilo kiharo duo sudu plastik kiwarna otomou, tolu tiub straw ih sinimbanan, iso ponimbang digital nosuratan ‘Camry’ om iso mangkuk plastik ih pinolisok idsuang kantung dilo,” ka dau.
Noboros di Hamzah do goduoduo suspek songowian koinsanai pinamahauan kalapas dilo nowit doid OPD LDU montok ponoriukan om laang potilombus. Pinomorisaan potilombus nokomoi pinoniisan waig sobu nogi nokoilo do suspek kusai dino nogi ‘positif dadah’.
Kes dilo soriukon tumanud Seksyen 39B Akta Dadah Koligogon 1952, om koinsanai suspek baino diti tinaan reman solinaid turu tadau id lokap IPD LDU.
Namot dilo, id kes misusuai ontok tadau Kolimo nakatalib, nakapamagahau nogi o tinimungan JSJN IPD LDU do bakaang kikotumbayaan dadah kawo syabu kiwinagat 520 gram miampai anggaran gatang RM50,000 maya ‘Ops Sarang Bersepadu’ ih pinapanau id Kampung Bakau, hiti.
Tumanud Hamzah id pinonugkuan kiikira jam 5.30 minsusuab dilo, nokokito o bogian pulis do iso tung cat nosuratan ‘Nippon Paint’ ih linopot miampai plastik oitom.
“Pinomorisaan potilombus kumaa suang tung cat dilo nokokito do iso lopot plastik oitom kisuang bakaang oniting kikotumbayaan dadah kawo syabu kiwinagat 520 gram,” ka dau mikuo minanamba do aiso kinagakaman pinoburu ontok pinapanau do pinonugkuan.
Kes soriukon tuamnud Seksyen 39B Akta Dadah Koligogon 1952.
Nokotindapou nogi id pitimbungakan abar dilo nga Boyoon Koupisan Ponoriukan Jinayah Watas IPD LDU ASP Mohd Asri Angkong, Insp M Hanis Mohd Nor om Insp Ningkan Aziz.