Koporintaan longkod minanahak toluod tagayo popoingkawas kapadtamangan koumoligan Sabah: Musa
SANDAKAN: Koporintaan longkod ogumu minanahak sakadai om toluod tagayo montok papatantu do koposodiaan koumatan (aset) koumoligan montok popoingkawas do kapadtamangan koumoligan id pogun diti doulu noh id bogian kosilahon.
Minoboros ih Boyoon Montiri Sabah Datuk Seri Musa Aman do ilo asil pinisokodungan togirot pialatan koporintaan pogun Sabah miampai koporintaan longkod id suang ahal koumoligan id pogun diti.
“Luguan Montiri (Datuk Seri Najib Tun Razak) ogumu noh minanahak sakadai om toluod tagayo montok papatantu do koposodiaan ‘aset’ koumoligan montok pogun diti doulu noh id bogian kosilahon.
“Koporintaan pogun mongunsikou miampai tonggungan koporintaan longkod nokomoi karaja popoingkawas kagu rontob koumoligan id pogun diti,” ka disio id pitimbungakan abar kalapas Abaabayan Papataak Rumamit Karaja Komander Bogian Koumoligan Poimbida Bogian Kosilahon Sabah (Esscom) hiti koniab.
Id abaabayan dilo, DCP Datuk Wan Abdul Bari Wan Abdul Khalid ih kopinsin pointantu pinapatahak karaja Komander Esscom kuminaa sumowoli dau DCP Datuk Hazani Ghazali.
Minoboros ih Musa do katabayan om kangai-angaian Esscom montok mintamong koumoligan om kokuasaan poingkakawas pogun diti montok kolumaagan rayat mimang au nodi milo olimon.
Ka disio ilo nogi kaanu popoingkawas do kotumbayanan rayat om nogi tutumombului nokomoi ahal koumoligan id pogun diti.
Id ahal dilo, Musa ih nogi Ponorikohon Tinan Koumoligan Pogun minoboros do koporintaan pogun om rayat Sabah monongkotoluod kumaa karaja pinoobi om pinongulubukan bogian koumoligan doulu noh Esscom solinaid diti.
“Manahak oku pamagatangan om monongkotoluod kumaa Wan Abdul Bari, songulun upisor wanan pulis ihorulud ginawo om kitoilalaan togumu montok kumaraja sabaagi komander Esscom solinaid diti,” ka dau.
Otumbayaan isio do kinalantaian om kinodimpotan Esscom solinaid diti potilombuson di komander ih kawawagu.