Isa luminapas karaja FGV
# Minomonsoi koputusan miampai agaan ginawo # Sulaiman linantik ponowoli naamot Ponorikohon FGV
PUTRAJAYA: Tan Sri Isa Samad nakaakun montok lumapas do karaja sabaagi Ponorikohon Felda Global Ventures Holdings Bhd (FGV) miampai agaan ginawo, ka di Luguan Montiri Datuk Seri Najib Tun Razak.
Idsuang ahal dilo, Najib ih nogi Montiri Kousinan minoboros do palantikan Tan Sri Dr Sulaiman Mahbob sabaagi Ponowoli Naamot Ponorikohon FGV kawawagu pinogirotkuasa nosondikot.
Montok mamagatang di Isa, linantik isio sabaagi Ponowoli Naamot Ponorikohon Tinan Monorina Padsakaian Tulun Ginumuan Tindal (SPAD), nosondikot nogi pinogirotkuasa.
Minoboros ih Najib do pogului diti nokoruba noh isio di Isa om bagas Montiri id Koupisan Luguan Montiri Datuk Seri Idris Jala montok mogiboboros miampai tototopot kokomoi do timpu tabantalan FGV om kuasa di Isa.
“Isa miampai agaan ginawo kaakkun lumapas do karaja Ponorikohon FGV.
“Montok mamagatang kuasa di Isa, kaakun oku mangalantik disio sabaagi ponowoli naamot (pemangku) Ponorikohon SPAD,” ka dau id pitimbungakan abar kalapas pinapatahak do kunsi kuminaa sanganu ngawi Pomulaminan Pakakaraja Tulun Ginumuan 1Malaysia (PPA1M) Selasih, hiti koniab.
Minoboros ih Najib do laang idsuang maan onuo montok papatantu do kopoindalanan kadilan om maya Tinan Ponoriukan FGV kokomoi do ahal di nantakan noh kumaa Boyoon Upisor Eksekutif FGV Datuk Zakaria Arshad om tolu tulun suai ih nosuhu noh suminuti tuminimpuun 6 Jun nakatalib di Tinan Potunud FGV.
“Iti pokionuon sabap ilo nopo nga ralan tonudon monorina ngawi komponi pinonguludan tulun ginumuan. Ponoriukan okon komoyon diolo kisala.
“Bogian Tinan Potunud (FGV) momonsoi koputusan aadil tososonong,” ka dau.
Suai ko Zakaria, nosuhu nogi suminuti nga Boyoon Upisor Kousinan FGV Ahmad Tifli Mohd Talha, Boyoon Upisor Eksekutif FGV Trading Ahmad Salman Omar om Monijor Tagayo Wanan Delima Oil Products Kamarzaman Abd Karim.
Miampai koponguludan kawagu, noboros di Najib do ilo kopokito do gaab porinta montok papataru do FGV id impoon di togirot om FGV haro timpu tabantalan di tosonong.
Uhoto nokuro ih Sulaiman linantik sabaagi ‘pemangku’, minoboros isio: “Iti gisom kopomonsoi yahai koputusan di tototopot. Tokou mositi haro ponimbanan tosikap. Nung tulun wagu linantik tinan potunud, ino maganu timpu.
“Muhang yahai FGV kotilombus miampai aiso kakasou,” ka dau.
Sulaiman, 67, nopo nga Potunud Okon Eksekutif Osimbayan FGV om Ponorikohon Telekom Malaysia (TM) om Ponorikohon Tinimungan Mongintong Mongigit Saham Minoriti, Institut Ponoriukan Ekonomi Malaysia om Jambatan Kedua Sdn Bhd.
Isio nogi ‘tokoh’ ih kitoilalaan togumu om nokumbal kuminaraja id porinta solinaid 38 toun miampai minongigit mogisusuai karaja, kaamung Boyoon Potunud id Unit Perancang Ekonomi (EPU) Koupisan Luguan Montiri om Boyoon Monunurat Komontirian Padagangan Suang Pogun om Ahal Momoguno.
Kobolingkangan FGV nakaanu pongintongan soira Isa om Tinan Potunud diolo minonuhu Zakaria, Ahmad Tifli, Ahmad Salman om Kamarzaman suminuti tuminimpuun 6 Jun nakatalib.
Sumusuut dilo, Tinan Monorina Susuap Malaysia (SPRM) pinotimpuun do ponoriukan kokomoi nakasala momoguno kuasa om ponombirangan di nantakan idsuang komponi pinonguludan tulun ginumuan dilo.
Porinta kalapas dilo minamalantik di Edris sabaagi bogian osimbayan montok manalasai do kobolingkangan dilo. Bernama