Poguluonon koumoligan ontok muli kampung: Jainab
KOTA KINABALU: Pokionuon o tulun ngawi papaharo do pomorisaan pogulu laid padsakaian sompori-pori pogului tumimpuun pindalanan muli id kampung.
Montiri Kotundaan Mogigion om Ahal Momoguno Datuk Jainab Ahmad Ayid minoboros do ilo sabaagi iso laang popogulu do koumoligan padsakaian mooi do oumolig korikot id tiyonon rikoton sompori-pori kopinamot Hari Raya.
“Romiton doti Hari Raya Aidilfitri ontok 25 Jun diti om tantu noh do kopoompit do koubasanan muli kampung songowian paganakan om mogirumohrumoh tumombului do tobpinai ngawi.
“Kopinamot suti di alaid diti nogi, maganu doti o paganakan do kosiwatan montok sumuti songowian ngawi kumaa id tampat ponombuluian kinoiyonon di kagayat.
“Koyuon diti kopoinggumu doti do trafik miampai kinatambaan ginumu padsakaian id ralan tagyo pointongkop Sabah. Tantu noh do sabaagi momoguno talun alun, kapasanangan toiko koumoligan padsakaian mositi do onuan pongintongan poimponu mooi do pindalanan oumolig korikot id tiyonon di rikoton,” ka dau.
Noboros disio ahal dilo ontok minanahak boboroson piotimpuun do Abaabaayn Sungkai om Pinoimaganan Kimpin Koumoligan Muli Kampung Songowian Paganakan Kampung Likas 2017 id Surau Nur Iman Likas, hiti di tadau Minggu nakatalib.
Minoboros ih Jainab do maya kimpin dilo, buuk basaan mongintong kikoompitan ‘tips’ kapamanaan tosonong om oumolig ontok muli mamaramai hariraya pinotikid kumaa tulun ngawi songkoiyonon.
Pialatan ‘tips’ ih pinatahak nopo do pomorisaan tayar padsakaian miagal papatantu do kosotolan tongus tayar di kangaam om bunga tayar kiharo id koyuon tosonong.
“Suai ko ilo, mositi papaharo tokou nogi pomorisaan lampung padsakaian mooi do ongosonong.
“Mositi nogi momoguno tokou ‘tips’ maya kimpin koumoligan diti mooi do kopurimon lobi oumolig ontok id pindalanan muli doid kampung nontodonon om kaanu beraya miampai ounsikou,” ka dau.
Namot dilo, noboros nogi dau mooi do iyolo ih muli id kampung kopinamot Hari Raya tuh manahak pongintongan koumoligan lamin sompori-pori.
“Kimpin diti nogi manahak ‘tips’ montok papatantu do lamin id koyuon oumolig ontok muli rumamai hari raya.
“Pialatan ‘tips’ ih patahakon nopo nga kada lisoko kunsi lamin idsuang pasu, suriba pomiihid kakod toiko idsuang poiyanan kasut id labus lamin.
“Potontuon longobon om titigaan kunsian togigirot om posunudon nogi kumaa balai pulis songindoros kokomoi aiso kou id lamin,” ka dau.
Id abaabayan dilo nogi, nokosiwat ih Jainab pinapatahak do toluod kuminaa 50 boyoon paganakan kopinamot Tadau Tapa.
Nokotindapou nogi ih Potunud Tinan Mogigion om Kotundaan Paganakan Pogun (LPPKN) Sabah Nurfarhana Lee Mohd Zulkiflee Lee.