Ukuman pinotilombus, minongorumpak kitimungan kisinjata

KOTA KINABALU: Kuut Takawas hiti pinotilombus kojiil 11 toun om iso pasut kumaa songulun kusai ih pinatantu miampai kasalaan mongorumpak kitimungan kisinjata.

Hakim Datuk Nurchaya Hj Arshad minomonsoi do koputusan dilo kumaa di Ismail Mohd Mansur, 19, kalapas nokorongou boros mantad bogian pongumoligan om pangadawaan.

Id kapangakiman dilo, au tinorimo di kuut o pokinsianan ih nobian di luyar Goldam Hamid om pinopotilombus do koputusan kuut tosuriba.

Ontok 16 Februari toun diti, Ismail pinaratu do ukuman dilo kalapas minangakun kisala tumanud Seksyen 395 Kanun Koinggoritan ih binasa songowian Seksyen 397 kanun iso’i.

Ukuman di pinoobi, kojiil gisom timpu 20 toun om ontokon pasut.

Tumanud panandasan, Ismail minaganu duo kotak sigup, duo butul tiinumon om taakanon tagaan, ontok 17 Disember toun nakatalib jam 8.49 dongotuong, id kadai serbaneka 24 jam Orange, Manggatal Plaza, hiti.

Ontok minomonsoi do kasalaan dilo, mokinsian nogi pinapakakang do duo kapak kumaa pakaraja kadai dilo.

Pangadawaan nobian di Kumoduo Mangadawa Tagayo Dinesh Raja.

Namot dilo, pinotilombus nogi di Nurchaya ukuman om kapatantuan kumaa songulun kusai om tondu sabap kasalaan mongorumpak kitimungan.

Koputusan dilo winonsoi kumaa Siti Shazwani Zainuddin om Eshyam Osman ih noobian luyan Amil Norhin, kalapas au minonorimo pokinsianan diolo.

Ontok 15 Julai toun nakatalib, goduoduo mokiinsian noilaan kisala mantad Kuut Sesyen tumanud Seksyen 395 Kanun Koinggoritan di obuli jiilon au kolobi 20 toun om miampai pasuton.

Siti om Eshyam sompori-pori pojiilon opod toun, om ontokon nogi Eshyam do iso pasut.

Iyolo songowian miampai songulun ih kakaal poingidu, minongorumpak songulun papapanau teksi om minamagahau tusin kiginumu RM2,600.

Kasalaan dilo winonsoi ontok 8 Disember 2014 jam 12.40 minsusuab, id Cyber Square, Tanjung Aru, hiti.

Kumoduo Mangadawa Tagayo Gan Peng Kun minaganu laang montok pangadawaan.