Terminal bas nososok # Ogumu muli kampung id timpu koimpupuson noh
KOTA KINABALU: Momoksomok orikot timpu tototopot montok mamaramai Hari Raya Aidilfitri om okitonan tulun togumu nokotimpuunnoh montok magandad giliran sumakai bas muli doid kampung natadon sompori-pori.
Osikap momoli tiket bas nopo nga laang di tosonong kopio montok mongilag mantad ongowian tiket ontok timpu koimpupuson noh.
Pinongintongan di pinapanau id Terminal Bas Inanam kotimpuunon jam 8 kosuabon koniab nokopokito do ogumu susumakai magandad giliran sumakai bas montok mongoi id Bogian Kosilahon Sabah.
Mohammad Faizal Bustiar,26, ontok korumai minoboros do isio om puru paganakan dau osikap minomoli tiket om okon ko ontok timpu koimpupuson noh.
“Tumanud do toilalaan, momoli tiket ontok timpu koimpupuson noh okon ko iso laang di kangaam kopio sabap laang irad dilo somoonu do obuli kontodonon dikoyu otoliban muli kampung tumanud timpu di pinalan,” ka dau kumaa do monunurat abar ontok romuto id Terminal bas Inanam, koniab.
Ka dau, iti nopo nga kumoinsan nogi minomoli tiket muli doid Sandakan sabap do pogului diti bulun noh isio pakaraja id kakadaian dilo.
Tumanud dau, toun diti isio om paganakan dau poingiyon id Kota Kinabalu sabap tujuan karaja om toilalaan muli kampung dilo nogi nga ih kumoinsan nogi.
Gifshan Narawangsa,21, minoboros do osikap nogi isio minomoli tiket bas sabap do orosian owian tiket ontok timpu koimpupuson noh momoli.
“Suai ko ilo, yoho om puru paganakan nogi tumongob sokiro ko koinsawat gatang tiket bas, igkuropoh nga tambang pakaayan id Sandakan kakaal RM43.
“Kangaam kopio tambang diti om ilo apatut do potilombuson, aiso nogi ahal ku miampai ahal tiket,” ka dau.
Namot dilo, songulun mantad pakakaraja papadagang tiket bas id terminal dilo, Khadijah Sitom minoboros do tiket bas pakaayan id Bogian Kosilahon Sabah nakaanu kopokionuan takawas.
Poingkuro poh nga ka dau, kogumuan susumakai ih minomoli tiket tosikap montok muli Hari Raya nopo nga mantad Sarawak.
“Kogumuan diolo mantad Lawas, Limbang om wookon mantad Brunei ih pakaraja id Sabah.
“Ka dau minomili iyolo sumakai bas montok muli kampung sompori-pori sabap tambang kapal tarabang ontok timpu koimpupuson nopo nga apagon kopio,” ka dau.