Esszone: Ponuu’an kumuung pinotihombus gisom 9 Julai

KOTA KINABALU: Ponuu’an kumuung id boogizan kavaigan tuu uvang id Zon Oumohig Kohisa’on Sabah (Esszone) ih nopupusan koniab potihombuson gisom 9 Julai dumonto.

Pesuruhjaya Polis Sabah Datuk Ramli Din minoboos do ponuu’an kumuung dino kopoompit do boogizan kavaigan uvang Tawau, Semporna, Kunak, Lahad Datu, Kinabatangan, Sandakan om Beluran.

Miampai kinopotihombusan ih tumimpuun suvab (baino) dino, saavi-avi mogiigizon id boogizan koompit pokionuon mooi kivaa id suvang hamin om au pakavasaon do sumuvang boogizan dino nokomoi piahatan jam 6 kosuvabon, ka disido id kopoihaan doiti koniab.

“Ponuu’an kumuung potihombuson montok papatantu do boogizan kavaigan dino nokomoi au osuvang do tuhun talaat ih mongundoonok koumohigan mononoizuk sompomogunan ih ppapanau do ponoizukan om tutumombuhui ih tumombuhui pulou ngavi podtuongisan,” ka disido.

Tumanud disido, tumanud do ponoizukan, tinimungan militan Abu Sayyaf om izioho ih papanau do kapaagatan moanazang montok kapaganu do usin pokihapusan mantad kaabatan Filipina, kakaal kuminam sumuvang montok monoodo panazangan om koimaan talaat tumahid pivohitan.

Minoboos zi Ramli do ponuu’an kumuung dino potihombuson montok maamjamin koumohigan om kohumaagan layat Sabah ih papadadi do momoguno kavaigan ih kavaigan om ih kivaa id boogizan tinda Esszone.

Ponuu’an kumuung dino nogi papasanang do popogiotkuasa om pongintongan kapapanaan bot om poposoibau do tivou oumohig om kotumboyo doid mongindapu ‘chalet’ om monginsada miampai koikotan kapal tinimungan koumohigan id posoihi koizonon dosido, ka disido.

“Manaak zou nogi kuasa kumaa saaviavi Huguan Pulis Uvang montok papahabus do poomit kumaa nombo-nombo mokianu ih momogonop do kootulan montok tuduvan kapaagatan ponginsadaan toi kivaa kogunoon koposonsog mozo boogizan ponuu’an kumuung,” ka disido. -Bernama