Upko minonohuod gaung ‘T’, hinopotan kumaa minampazat Kem Katolik Tomuhok Pogunon
PENAMPANG: Koisaan Pasokmomogun Kadazandusun Murut Misompuu (Upko) minanaak tohuod gaung ‘T’ om hinopotan kumaa minampazat Kem Katolik Tomuhok Pogunon.
Tohuod dino nokomoi pinataak di Monunuat Tagazo Upko Datuk Donald Peter Mojuntin kumaa Poniikon Panganjul Carolyn Maximilan Golingai id Dewan Gereja St. Joseph Pogunon, id tadau Kotohu nakatahib.
Minoboos zi Donald do gaung ‘T’ dino nopo nga gunoon mampazat om vinakas monunuduk ontok kem dino pinapanau.
Ka disido, suvai ko monuhung popoingkavas do ‘kerohanian’ hoohobi doid sinakagon tomuhok ngavi, kem dino nogi kaanu papavakas do ‘kerohanian’ om popoinsomok do pisaan id piahatan mampazat ngavi.
“Pinoiho zou do kem miaga diti nakaanul no mantad podi tohu toun misusuut kaamung toun diti.
Ginumu minampazat kem dino nogi kopogunsub kozo om tantu no do iho nopo nga ‘rezeki’ kopotopotan komiti panganjul montok papahantoi do kem diti,” ka disido.
Donald ih nogi Huguan Upko Boogizan Penampang minoboos do kapanganjulan Kem Katolik Tomuhok Pogunon kilati kozo om koontok kozo sabap iho nopo nga impoon montok monoodo tuhun ngavi kiguno hoohobi komuhakan ngavi montok popoingkavas do ‘kerohanian agama’. Naamot dino, Poniikon Panganjul Kem Katolik Tomuhok Pogunon Carolyn Maximilan Golingai minoboos do kem diti pouhanon mantad 23 gisom 25 Jun diti id Dewan Gereja St. Joseph Pogunon.
Ka disido, kem dino nampazat di soginumu 120 tuhun. Iho pinanjul songovian Komuniti Komuhakan Panganjul, PIBG om mongingia ngavi.
Nokotindapou nogi Mohoingon Kampung (Kg) Pogunon Wilfred Lojuki, Poniikon JKKK Kg. Pogunon Jefry Lojutin ih nogi Poniikon Laan Pogunon om Huguan Laan Upko Pogunon Prisca Lambun.