Pakalaja minongolumpak touki

# Usin tunui RM72,000 ih novit minogidu nokito mahaik # Pulis minanaan apat pakalaja om songuhun bagas pakalaja

PENAMPANG: Pulis minanaan himo tuhun kaamung pakalaja om songuhun bagas pakalaja kadai kahapas minogovit minogidu usin tunui hobi RM72 ngoibu om tohu unit televusyen kitukuan agazo id suvang kadai papadagang taakanan kotonobon osikap id Plaza 333, doiti, di tadau Koiso nakatahib.

Pesuruhjaya Polis Sabah Datuk Ramli Din minoboos do koinsanai suspek ih kiumul 17 gisom 23 toun dino nakaanu minanaan id piipio tampat doiti id suang timpu piipio jaam kahapas monijol kadai minonoodo luputan pulis kokomoi do kinantakan dino.

“Kinantakan di kikotumbazaan do nantakan piahatan jam 2 om jam 6 kosuvabon ontok 26 Jun dino noihaan di songuhun monijol kadai ontok popotimpuun da poniagaan ih nokoiho do tohu unit televisyen id suvang kadai dino nokomoi natagak.

“Asil pinomolisaan potihombus id kadai dino nokomoi nogi nokoiho do usin tunui soginumu RM72,096.70 id suang pati bosi nogi tinanggazan di tuhun manaanakau.

“Kinantakan kahapas dino pinoluput doid boogizan pulis id jam 10 kosuvabon poguhui pinotimpuun tokou do kalaja mogium tuhun ih minamabak suminuvang kadai dino nokomoi,” ka disido id pitimbungakan abal id Hongkod Upis Pulis Uvang (IPD) Penampang, koniab.

Nokotindapou nogi Kumoduvo Pesuruhjaya Polis Sabah Datuk Razarudin Husain om Huguan Koupisan Ponoizukan Jenayah Sabah Datuk Salehuddin Abdul Rahman.

Minoboos zi Ramli do pakalaja poimbida ih tinuidong montok papanau do ponoizukan kokomoi do kes dino kahapas dino nakaanu minogium himo tuhun kaamung duvo tondu id piipiro tampat doiti id jam 1 sosodopon ontok tadau iso’i.

Ka disido apat mantad suspek noihaan sabaagi pakalaja kadai ih binabak suminuvang om songuhun vagu bagas pakalaja kadai ih vagu po huminapas kajala sangadau poguhui kinantakan.

“Ontok kinagakaman dino, nakaanu pulis minamaga’au mahik soginumu RM72,096.72, kulita kavo Toyota Vios sanganu zakak suspek, tohu unit televisyen id iso pomuhaminan doiti, topeng voos, salung hongon, souva om beg galas,” ka disido.

Minobos isido do koinsanai suspek kikotumbazaan do minongukab kadai minomoguno kunsi ‘pendua’ di pinanakau poguhui diti om suspek ih nogi bagas pakalaja kikotumbazaan do nokoiho do pionitan kunsi pati bosi dino nokomoi poguhui minogovit minogidu usin tunui dino.

Tumanud disido saavi-avi suspek baino noriman om kes soizukon tumanud Seksyen 457 Kanun Koundosoan.

Usin tunui ih na’au mahik di tinimungan pulis ontok pinanaanan suspek. RAMLI (tanga) mongintong usin tunui hobi RM72 ngoibu ih tinanggazan suspek miampai intongan di Razarudin (vanan) om Salehuddin (gibang) kahapas pitimbungakan abal id IPD Penampang,...