Ahmad Kamarulzaman: Mamalan popoinggayo do KD Sri Sandakan
SANDAKAN: Panglima Tentera Laut Laksamana Tan Sri Ahmad Kamarulzaman Ahmad Badaruddin minoboros do bogian dau baino diti masaon id pamalanan montok popoinggayo do KD Sri Sandakan osiliu Markas Wilayah Laut Dua.
Tumanud dau do pamalanan baino diti masaon mongintong mantad kawo montok mogium tiyonon di lobi kangaam suai ko kapaganu do poruntukan om pisokodungan miampai agensi ngawi di koompit kamaung noh Koporintaan Pogun Sabah.
“KD Sri Sandakan kiharo noh id bogian kakadaian mantad solinaid diti om kotundaan di ogumu kopio.
“Iti ponokotanda do soira Susumangod Daat Diraja Malaysia (TLDM) popoiyon do unit-unit id pangkalan om pinoposiliu do koiyonon posorili nokotounda kopio. Ilo nakapanahak iso koponumboyo koumoligan di akawas kopio om nogi kopoinggumu do kotundaan songkoiyonon.
“Miampai noturidong nodi Markas Pemerintahan Armada Timur, kigaab tokou montok popoinggayo do KD Sri Sandakan silihon sabaagi iso markas ilo nopo nga Markas Wilayah Laut Dua,” ka dau id Abaabayan Pangaramitan Hari Raya Aidilfitri Bogian TLDM Sandakan id Walai Tiyonon TLDM, hiti di kawawagu.
Nokotindapou nogi ih Komander Pangkalan TLDM Sandakan Kapten Zahari Samsuri om Puru Lamin Koundangan Pogun Karamunting Datuk Charles O Pang.
Pogului dilo, Ahmad Kamarulzaman kiharo id abaabayan kotombuluian papanau karaja id Sabah montok mongintong koposodiaan om ahal koumoligan kadaatan id Sabah.
“Minggu nakatalib, kuminakap oku do pulau ngawi om pongiyanan tokou id Daat Sina Kaabatan. Nokongoi oku nogi doid Lolokiton Daat Tun Azizan id Daat Sulu om nokopongintong do koyuon do hilo om nasantaban kopio ginawo ku.
“Iti sabap, au tokou obuli alawong kokomoi do panangadan om kobolingkangan pongundoronokan di antakan id bogian tokou doulu noh ih haro piwolitan miampai Selatan Mindanao. Mantad dilo, poingkawason tokou koumoligan kawaigan pogun doulu noh id Kosilahon Sabah miampai popoiyon do harata ngawi tokou kaamung noh duo lolokiton daat tokou ilo nopo nga Tun Sharifah Rodziah id kawaigan Semporna om Tun Azizan id kawaigan Sandakan.
“Iti nopo nga iso laang tokou montok papatantu do rayat Sabah doulu noh id Sabah tuh kaanu mamaramit Hari Raya miampai otoonong, oumolig om ounsikou,” ka dau.