Duo mananakau tinaan minananggoi tusin RM200 om golong longon RM1,200
KOTA KINABALU: Duo mananakau kusai ih nogi miadiadik nakaanu minanaan di sontimungan pulis kalapas minananggoi tusin tunui kiginumu RM200 om golong longon sanganu kadai kigatang RM1,200 id iso kadai pomolian barang id Salut Commercial Centre Ralan Sepanggar, hiti di ontok 23 Jun nakatalib.
Pesuruhjaya Polis Sabah Datuk Ramli Din minoboros do suspek ih pinapanau pongorumpakan kitimungan dilo id jam 11.50 kosuabon miampai kisinjata iso pisau om minamagamu sanganu kadai tondu kiumur 28 toun.
Ka dau ontok minongorumpak kadai pomolian barang dilo, songulun mantad suspek suminuang kadai miampai poingigit pisau om suspek suai poingandad id korita montok sumodia do mogidu.
“Minaganu laang mantad kopoilaan di notorimo, karaja mogium pinosikap pinapanau om nakaanu tokou minanaan suspek koiso kiumur 22 toun id iso pomulaminan id Tuaran id jam 1 minsusuab, om minamagahau iso korita Perodua Viva ih kikotumbayaan ginuno ontok kinantakan.
“Sojam kalapas dilo, suspek koduo ih nogi tabang kumaa kinagakaman koiso kiumur 24 toun nakaanu minanaan id Kakadaian Manggatal.
“Goduo-duo suspek noilaan ‘positif’ dadah kawo syabu om noriman gisom 29 Jun diti,” ka dau id pitimbungakan abar id Longkod Upis Pulis Watas (IPD) Penampang, koniab.
Nokotindapou nogi ih Kumoduo Pesuruhjaya Polis Sabah Datuk Razarudin Husain om Boyoon Koupisan Ponoriukan Koimaan taraat Sabah Datuk Salehuddin Abdul Rahman.
Minoboros isio do pulis baino diti kakaal mogium songulun kagu suspek ih nointutunan sabaagi Norafil toiko Apel tulun kinoiyonon kiumur 20 toun ih nogi kikotumbayaan do nokoompit id suang kes manakau kitinumgan dilo.
“Tulun togumu ih haro kopoilaan kokomoi do tulun ih pokigakaman dilo pokionuon sumikap rumomut kokuasaan pulis toiko rumikot id Balai Polis songindoros montok monulung ponoriukan.
“Kes diti soriukon tumanud Seksyen 395 om 397 Kanun Koinggoritan di obuli ukumon jiil gisom 20 toun toiko pasut nung katantu do kasalaan,” ka dau.