Ribuan tulun nokotindapou lamin poingukab Abdul Rahman
KOTA KINABALU: Kiikira 4,000 tulun nokotindapou minamaramai do Abaabayan Lamin Poingukab Aidilfitri Montiri id Koupisan Luguan Montiri Datuk Seri Abdul Rahman Dahlan, hiti koniab.
Abaabayan lamin poingukab tuminimpuun jam 9 kosuabon dilo notindapou di tulun ngawi mogisusuai tinaru id Sabah om tombului ngawi pinosurungan miampai taakanan poimbida ontok tadau raya miagal sate, ketupat, lemang om rendang.
Moboros kumaa monunurat abar id ramai dilo, minoboros ih Abdul Rahman do kinotindapaan togumu tulun ponokotanda do tiwou oiyo kotokou okito kopio montok rayat di mogisusuai tinaru om agama id Sabah.
Momuruan mantad parti pambangkang nogi nokotindapou monokirumoh miampai momuruan porinta id ramai dilo. Okito tokou koyuon lobi osonong om alansan kopio oku miampai tiwou oiyo kotokou om kapaganakan pialatan iso om suai kotilombus gisom soira-ira noopo.
“Misuai doti pomusarahan tokou mantad kawo pulitik, ekonomi toiko porinta nga id abaabayan diti kaanu tokou mogium titik kopiiradan di obuli poposompuru rayat,” ka di Puru Parlimen Kota Belud dilo.
Nokotindapou nogi id abaabayan dilo nga Gounal Pogun Sabah (TYT) un Dr Juhar Mahiruddin.
Pialatan tombului kingangaran suai ih nokotindapou nga Boyoon Montiri Datuk Seri Musa Aman, Montiri Komunikasi om Multimedia Datuk Seri Dr Salleh Said Keruak om Kumoduo Boyoon Montiri Datuk Seri Yahya Hussin. Naamot dilo, minoboros ih Abdul Rahman do sabaagi montiri di kitonggungan montok Unit Mamalan Ekonomi (EPU), tumilombus isio poposiliu do kotundaan Sabah sabaagi ahal tagayo id bogian pisompuruan.
“Sabah kakaal momoguno do ogumu kotundaan om asaru oku kaanu do tutuduk mantad Luguan Montiri (Datuk Seri Najib Tun Razak) om Boyoon Montiri Sabah (Musa) montok papatantu do onu kotundaan di pokimamaan kopio,” ka dau. -Bernama