Kotundaan Sabah poguluonon
# Papaharo ih Abdul Rahman do pogibabarasan miampai Luguan Montiri om Boyoon Montiri
KOTA KINABALU: Aahal kotundaan id Sabah silihon do pokimamaan kopio sabap do pogun diti kakaal momoguno do ogumu kotundaan.
Montiri id Koupisan Luguan Montiri Datuk Seri Abdul Rahman Dahlan minoboros do sabaagi montiri kitonggungan nokomoi Unit Mamalan Ekonomi (EPU), mogisusuai pogibabarasan miampai Luguan Montiri om Boyoon Montiri Sabah nakaharo montok montok koponguhanan kotundaan id Sabah.
“Sabah kakaal momoguno do ogumu kotundaan. Mantad podi nonuan oku kuasa montok mongigit EPU, mogisusuai pogibabarasan pinaharo kokomoi ahal kouhangan om kogunoon kotundaan Sabah.
“Solinaid diti, kiharo piipiro projik tagayo nookunan tokou noh poruntukan miagal koponginggayaan Tutubpoon Kapal Tumulud Sandakan kiginumu RM80 riong, RM400 riong montok popoinggayo ralan id posorili Universiti Malaysia Sabah (UMS) om RM29 riong montok projik kapanahakan waig tolidang id Ranau,” ka dau ontok romuto id Abaabayan Lamin Poingukab Aidilfitri id tiyonon dau koniab.
Monongkotoluod nogi isio kumaa Montiri Ponombuluian, Koubasanan om Kinoiyonon Posorili ih nogi Puru Lamin Koundangan Pogun (ADUN) Karanaan, Datuk Seri Panglima Masidi Manjun sabap pinoposuulu do kobolingkangan kapanahakan waig tolidang id Ranau.
Rahman ih nogi Puru Parlimen Kota Belud minoboros do kinorikotan tulun togumu id Abaabayan Lamin Poingukab Hari Raya Aidilfitri nopo nga ‘platform’ tosonong kopio montok toinsanan bogian popogirot kagu do piromutan piobpinaian id pialatan iso om suai.
Ka dau lamin poingukab ih pohoroon kaanu popotimung do tulun ngawi mantad toinsanan bogian montok rumikot mogitatanud ngawi mamaramai do karamaian dilo.
“Baino diti okito tokou tiwou oiyo kotokou om piobpinaian mogisusuai tinaru id Sabah ih otopot okito kopio id potitikid wuros tulun togumu di nokotindapou. Nokotindapou nogi id abaabayan dilo nga, Gounal Pogun Sabah (TYT) Tun Juhar Mahiruddin om sawo Toh Puan Norlidah RM Jasni, Boyoon Montiri Sabah Datuk Seri Panglima Musa Haji Aman, Kumoduo Boyoon Montiri Datuk Seri Panglima Yahya Hussin, Montiri Komunikasi om ultimedia Datuk Seri Panglima Salleh Said Keruak, Ponorikohon Gerakan Sabah Datuk Gordon Leong, Ponorikohon MIC Sabah Datuk V Jothi om momuruan parti pikoruhangan Barisan Nasional (BN) ih suai.