MKN sinuhu monoliduk toinsanan kawo panangadan kikoompitan koumoligan ‘siber’
KOTA KINABALU: Porinta manahak pongintongan tototopot kokomoi koimaan taraat ‘siber’ id Malaysia om minonuhu do Tinan Koumoligan Pogun (MKN) montok monoliduk toinsanan kawo panangadan di kikoompitan koumoligan ‘siber’ id pogun diti.
Montiri Komunikasi om Multimedia Datuk Seri Panglima Dr Salleh Said Keruak minoboros do MKN mongintong do panangadan ‘siber’ songowian agensi ngawi kikoompitan sabap do panangadan’siber’ miagal ‘Ransomware Wannacry’ ih nokodonto pomogunan di kawawagu kikoompitan kopio miampai koumoligan pogun.
“Nokopomonsoi noh MKN do kopoilaan kokomoi do ahal diti (panangadan Ransomware Wannacry). Poingkuro poh nga, aiso poh nunuunu ruputan notorimo tokou ih nantakan ino id Malaysia.
Porinta manahak kopoilaan panangadan miagal diti om tokou mositi gumaga do pogun tokou idsuang ahal koumoligan ‘siber’,” ka dau id Abaabayan Lamin Poingukab Aidilfitri id tiyonon disio di sodop Koonom nakatalib.
Minoboros isio do komontirian dau maya Suruhanjaya Komunikasi om Multimedia Malaysia (MCMC) manahak pisokodungan poimponu kumaa MKN montok papanau do tonggungan dilo.
Minoboros ih Salleh do pogun kigunokopio haro ‘teknologi’ ih toririmo poingkawason montok tumoguang ponokialitan panangadan ‘siber’ ih maid-laid koburu.
“Momoguno nga pomogunan ‘siber’ nogi mositi toririmo miingat-ingat mooi do panangadan irad dilo kaanu mangantob.
“Somoon, kaanu tokou gumaga do koumoligan ‘siber’ pogun tokou, katapi kalapas dilo haro kagu ‘teknologi’ wagu ih koimbulai.
Om, pialatan pongintongan tototopot tokou montok tumoguang do panangadan miagal diti nga popoingkawas ‘teknologi’ ih haro dotokou mantad timpu doid iso timpu,” ka dau.
Minanahak nogi isio jominan do porinta toririmo papaharo do pisokodungan miampai pogun suai sabaagi laang montok mongorulan panangadan ‘siber’.