Sinakagon tomulok harata kiguno pogun: Hajiji
TUARAN: Tinimungan sinakgon tomulok ngawi nopo nga harata pogun di kiguno kopio sabap iyolo noh ih papatantu do kotundaan pogun ontok timpu rumikot.
Montiri Koporintaan Kinoiyonon om Pomulaminan Datuk Seri Hj Hajiji Hj Noor minoboros do montok ahal dilo, rolu tinimungan sukod tomulok ngawi baino minog do kinongoon om onuan pongintongan tototopot do porinta sabaagi kakamot tagyo kumaa ahal kotundaan pogun.
“Om, onu ih apatut do papanon tokou baino diti nga tokou mositi toririmo minsomok miampai tulun tomulok toiko sukod tomulok ngawi diti montok mokinongou nunu noopo ih pokionuon diolo.
“Au tokou doti koilo nga iyolo lobi koilo onu ih tosonong montok diolo ontok timpu tabantalan. Mantad dilo, Transormasi Nasional 2050 (TN50) nosiliu agenda kiguno montok momodimpot do gaab dilo,” ka disio.
Isio ih nogi Puru Lamin Koundangan Pogun (ADUN) Sulaman minoboros ahal dilo kalapas pinotimpuun do ‘Program Jalinan Mesra’ kopinamot pangaramitan Hari Raya Aidilfitri 2017 id Kampung Penimbawan, hiti.
Namot dilo, asaga Hajiji do monginsonong do piipio kounalan ‘infrastruktur’ miagal galanggang futsal, talun alun om kapanaakan paip ih haro id kampung dino nokomoi suai ko manahak do poruntukan kousinan kumaa Koisaan Komulakan wawasan Watas Tuaran (Penawar) ih minanganjur do abaabayan dilo,
Nokotindapou nogi id abaabayan dilo nga Timbang Boyoon Umno Tuaran Abdul Kassim Hj Razali, Monunurat Bogian Johari Saiman om Ponorikohon Panganjur Norjaip Hj Daip.