DBKK posodia misokodung miampai NGO poingkawas kosonongon kopoposion tulun ngawi
KOTA KINABALU: Dewan Bandaraya Kota Kinabalu (DBKK) poinsodia misokodung miampai tinan okon porinta (NGO) montok popoburu do Kakadaian tagayo Kota Kinabalu om popoingkawas kosonongon kopoposion tulun ngawi.
Minoboros ih Mayor DBKK Datuk Yeo Boon Hai do ilo kaanu mongintong maya pisokodungan DBKK miampai Koisaan Kotorinaan Ambulan Lions (LASS) Kota Kinabalu.
Ka dau LASS nakapanahak noh do kotorinaan di tosonong solianid walu toun, gisom pinapaharo do iso kosiwatan hinonggo DBKK obuli umampai id kaparagatan kotorinaan di papanaon id Ralan Gaya ontok tikid tadau Minggu.
“Otumbayaan oku do kiharo kosiwatan suai di lobi agayo montok DBKK papaharo do pisokodungan miampai LASS.
“Alansan kopio oku do toinsanan tinan kaanu manahak sokodung kumaa DBKK montok momodimpot iamn-imanon miampai poposiliu do Kakadaian Tagayo Kota Kinabalu lobi oborisi,, otomou om obuli rikohonon,” ka dau id Abaabayan Pinotimpuun Ponongkusan pomirukutan pinanjur do LASS, koniab.
Teks pason dau pinolombus di Boyoon Potunud DBKK Datuk Joannes Solidau.
Minoboros Yeo do ponongkusan dilo nogi nakaanu minamagayat pongintongan di togumu minampayat id posorili kakadaian tagayo diti.
Ka dau LASS ih tuminimpuun do kotorinaan diolo ontok 2011 nakaanu minonulung 3,877 kes tulun sumakit mantad ouran sumakit gisom sumakit labus.
Tumanud disio kotorinaan di patahakon LASS kotopong miampai ‘standard’ ambulan tosonong kopio om kabaalan ih suai.