Pulis minanaan motosikal id ‘Ops Samseng Jalanan’
KOTA KINABALU: Kiginumu onom motosikal tinaan pulis id ‘Ops Samseng Jalanan’ di pinapanau id piipio tampat posoihi kaakdazan tagazo di minsusuvab koniab.
Huguan Pulis Uvang Kota Kinabalu Asisten Komisioner M Chandra minoboos do saavi-avi motosikal dino nokomoi tinaan tumanud Seksyen 60 Akta Padsakazan Lahan (APJ) 1987.
Tumanud disido padsakazan ih na’au dino kopoompit do kahasaan papanau aiso lisin, sukai lahan naavi timpu, numbul kopolijistahan au tuminanud kootulan om ‘modifikasi’.
“Piahatan tampat di nokoompit kamaung no Lahan Coastal, Lahan Lintas, Lahan Tuaran Bypass, Lahan Kepayan om Lahan 1Borneo.
“Kiginumu 64 padsakazan mogisusuvai kavo pinolisa miampai osoizuk poompus pinapanau kalaja diti pinapanau om soginumu 68 tuhun nogi pinolisa,” ka disido doiti koniab.
Minoboos isido haang popogiotkuasa papanon miampai potihombus montok momunso kapaagatan ‘Samseng Jalanan’ om nogi popogiotkuasa undang-undang talun alun.
Suvai ko iho ka disido, operasi dino nokomoi nogi mokimaama doid kopomunsaan koimaan talaat om poposoibau do ‘Persepsi Akan Ditangkap’ (POBC) id tizonon operasi.
Minoboos Chandra do saavi-avi motosikal ih nataan pataakon doid Koupisan Padsakazan Lahan (JPJ) montok pomolisaan ‘teknikal’.
Ontok timpu iso’i ka disido, iho montok popomiho do sanganu padsakazan humikot montok pogonuan haang sabap pinapakavasa do sosonguhun di aiso lisin B2 ih ototopot do papapanau.