APMM minonulung minogowit tulun sumakit pokiubatan doid lamin pongusapan
KUDAT: Agensi Popogirotkuasa Maritim Malaysia (APMM) Kudat pinapaharo do kapamanaan kosianan toiko kagaanan ginawo montok mogowit tulun sumakit ih kitoruol nopuraan idsuang topos montok pokiubatan potilombus id lamin pongusapan, songkosodop.
Potunud APMM Watas Sabah om Labuan Laksamana Pertama Mohd Zubil Mat Som minoboros do sumakit kusai kiumur 58 toun ih nosindualan sabap nootungan guas jayu ontok minanagad guas kayu id kabun disio pinoundaliu mantad Klinik Kolidasan id Karakit, Pulau Banggi, doid Lamin Pongusapan Kudat id tana tagayo Kudat montok pokiubatan potilombus.
“Ontok jam 5.25 sosodopon kosodop, longkod papanau karaja APMM nokotorimo pamalahauan mantad Klinik Kolidasan karakit, Pulau Banggi, kokomoi do kogunoon bot sabap bot posodia haro (sanganu koupisan kolidasan) kakaal naraag.
“Yoho kalapas diri minonuhu mooi do iso bot APMM pootodon do hilo montok manahak ponulungan om bot dilo nokorikot id Karakit id jam 6.40 sosodopon,” ka disio id kopoilaan hiti koniab.
Tumanud Mohd Zubil bot APMM ih minogowit sumakit dilo kalapas diri nokorikot id Jeti Marina, tana tagayo Kudat id jam 8.40 dongotuong om kalapas dilo sumakit dino nowit doid lamin pongusapan minomoguno do korita ambulans ih posodia poingandad id jeti dilo.
Ka disio APMM toririmo poinsodia manahak kotorinaan om ponulungan kumaa tulun ngawi om agensi ngawi porinta soira antakan kaagaban toiko kaantakan taraat kinoiyonon.
Tumanud disio tulun ngawi om agensi porinta obuli rumomut MERS999 montok kapaganu do ponulungan APMM. Bernama