KDM Malaysia minggisom poingkavas sunduvan do pogiigizon mamasok
SOOK: Minggisom kozo KDM Malaysia montok maganu do haang popoingkavas komogoton kopooposizon tuhun mamasok id pogun Sabah miampai papavakas do sunduvan pogigizon dioho ih kogumuan poingizon doid habus kakadazan.
Minoboos ih Polosidin KDM Malaysia, Datuk Peter Anthony do vookon haang toguvangon do kotinanan okon ko polinta diho nopo nga manaak kasakadazan popomogot sinikulon suvai ko mongukab nogi do mogisusuvai kosivatan kalaja kumaa mogigizon.
“Haang manaak kasakadazan kumaa mogigizon nopo diho nga toinaan maza do pinggisaman kotinanan okon ko polinta om nogi kasakadazan momoguno do kousinan kopolintaan,” ka di Peter.
Pinopointahang ih Peter diho tu isido po nogi vagu oh Timbang Polosidin do Parti Warisan Sabah di ontok pinopoimagon do ababazan kinapataakan pongunsikou miampai kinopotunuzan suat kinopomododizan Tadika Cahaya Hati doid Kg Bonor doiti di songkoniab.
Poingampai nogi potindapou do ontok diho ih momuu’an Parti Warisan Pensiangan, Ahuar Rasam, Mudi Dubing (Tulid), Martin Tommy (Sook) om Pendeta SIB, Dinili Rauseh.
Ontok kinotombuhuzan diho, nokosivat nogi Peter kumakap do posoihi tadika nokomoi montok minongoi pongintong do kounalan ngavi di kivaa montok gunoon do susumikul ngavi.
Naamot diho, agazo kahansanan di Peter do kotoimo tadika ngavi minsosondii do sakadai om soou po ma do ododizan oh kopointutunan do Komontilian Balajalan Sabah, tadika ngavi miaga diho nopo nga poomungon id siibo kotoinaan do komontilian.
Montok popoingkavas ontodon kousinan mogigizon, agazo kahansanan di Peter do aangazan do kopolintaan monuidong oh kilang panaadaan tumau pagansak id uvang Sook tu kogonop kozo asil pomutanaman piasau mamau id uvang ngavi posoihi miaga do Tenom, Keningau om Tambunan montok kapanaadaan asil kilang.
Haang manakadai koposizon mogigizon nga kapaampai nogi do kopomugasan sukai GST, kopomupusan do kootulan galan komunal om miampai nogi do popoguhi tana komunal kumaa id kosongonuan do tuhun mogigizon ngavi.