Pulis nakaanu minanalasai 10 kes
# Duo geng mamabak lamin nakagom
KOTA KINABALU: Tondu om panagih dadah pialatan ‘suspek’ ih giankom pulis kopoompit do duo ‘geng’ di aparagat id suang kaparagatan mamabak lamin om manakau mantad podi kotimpuunon toun diti.
Pesuruhjaya Polis Sabah Datuk Ramli Din minoboros do kiginumu walu ‘suspek’ kaamung songulun tondu nagakom id suang apat timpu pinonugkuan, di kawawagu.
Tumanud dau kinagakaman koinsanai ‘suspek’ nogi nakaanu minanalasai do kiginumu 10 kes mamabak lamin om manakau posorili Kota Kinabalu miampai ginumu anggaran kinorugian kiikira RM147,500 om ginumu pinamahauan barangan lotirik kigatang RM70,000.
Ka dau kikira jam 8 gisom 10 dongotuong ontok 28 Jun nakatalib, pinapaharo o bogian dau do pinonugkuan id duo lamin posorili Taman Keramat hiti kopoompit do kinagakaman apat puru ‘Geng Farah’.
“Apat suspek dilo kaamung noh songulun tondu ih nogi kikotumbayaan do boyoon ‘geng’ kiumur 36 toun om tolu kusai kiumur bindurugan 19 gisom 33 toun.
“Duo ‘suspek’ nogi noilaan ‘positif dadah’ kawo syabu om tolu puru ‘geng’ diti haro rikud koimaan taraat laid kopoompit do kasalaan tumanud Seksyen 380 Kanun Koinggoritan om Seksyen 15 (1) Akta Dadah Koligogon (ADB) 1952.
“Asil pinongudian minonoriuk nokoilo do kaapat-apat ‘suspek’ nokoompit miampai ‘positif’ sokurang-kurang do turu kes mamabak lamin posorili watas Kota Kinabalu,” ka dau id pitimbungakan abar hiti koniab.
Minoboros isio do koturu-turu kes dilo kopoompit do anggaran kinorugian kiginumu RM57,500.
Suai ko ilo ka disio, asil pinonugkuan nogi nakapamagahau barangan kigatang kiikira RM35,000 kopoompit do iso Proton Saga, 31 unit tulingou om 14 kawo barangan lotirik.
Kakaal poh bogian dau monoriuk kes dilo om koinsanai ‘suspek’ noriman solinaid turu tadau tuminimpuun 29 Jun gisom 5 Julai diti tumanud Seksyen 457 om Seksyen 380 Kanun Koinggoritan.
Id ahal dilo, kakaal poh pulis mogium songulun kagu ‘suspek’ nointutunan sabagai Masrinhy Masazing toiko Max, 35, kikotumbayaan tambalut kumaa ‘suspek’ tondu di nagakom dilo.
Ka dau ‘suspek’ ih kakaal ihumon noilaan nokoompit miampai kes ngawi suai ih papanaon di ‘Geng Farah’.
Idsuang ahal dilo pokionuon do bogian dau o tulun togumu di haro kopoilaan kokomoi ‘suspek’ mooi rumomut Upisor Monoriuk Sarjan Afizan Kasijan id numbur 0198601230.
“Nakanau toou nogi minamagakom iso kagu geng mamabak lamin nointutunan sabaagi ‘Geng Jeopy’ idsuang duo pinonugkuan kopoompit do duo premis id Kampung Lok Kawi Penampang om Lido Square.
“Pinonugkuan koiso ontok 29 Jun nakatalib kiikira jam 5 sosodopon om pinonugkuan koduo ontok tadau Mingguu nakatalib kiikira jam 2.30 sosodopon.
“Apat kusai nataan kiumur id bindurugan 35 gisom 45 toun om koinsanai ‘suspek’ noilaan positif dadah kawo syabu,” ka dau.
Minoboros ih Ramli do asil pinonoriukan nokoilo do kaapat-apat ‘suspek’ nokoompit sokukurang do idsunag tolu kes mamabak lamin om manakau padsakaian posorili Kota Kinabalu mantad podi Mac nakatalib gisom Jun toun diti.
Koinsanai kes dino nokomoi, ka dau, kopoompit do ginumu kinorugian kiikira RM92,000 om kiikira RM35,000 asil pinamahauan naanu mantad pinonugkuan.
Tumanud dau pialatan barangan di nahau kaamung noh iso korita Proton Saga, 14 komponen komputer, iso televisyen, 22 kunsi padsakaian mogisusuai kawo, iso komputer riba, duo talipaun piowit-owit om onom koumatan kikotumbayaan do montok pamabak lamin.
“Koinsanai suspek noriman solinaid apat tadau tuminimpuun 30 Jun nakatalib om noputan reman montok popotilombus do ponoriukan tumanud Seksyen 457 om 379 A Kanun Koinggoritan.
“Modus operandi goduo-duo geng diti poposiliu do kilang, upis om lamin tiyonon sabaagi ririkoton miampai kopoompit do kapagaratan manakau barangan lotirik om tusin tunui,” ka dau.
Pinosorou nogi disio mooi do tulun togumu au umampai miampai nunu noopo ponorinaan moniaga kopoompit do barangan pinanakau.
Ilo sabap ka dau, momoli om kiharo barangan pinanakau nopo nga iso kasalaan tumanud Seksyen 411 Kanun Koinggoritan.
Nokotindapou nogi ih Boyoon Pulis Watas Kota Kinabalu Asisten Komisioner M Chandra.