SSPA pinotimpuun dokoiyonon kopomogompian sada paus om pari
SANDAKAN: Koisaan Kopongoligan Sada Paus Sabah (SSPA) pinotimpuun do koiyoon montok manahak pongintongan doid koponginwaguan undang-undang om ralan tonudon, ponoriukan om kopurimanan sabaagi laang montok popogirot do kopomogompian sada paus om sada pari id Malaysia doulu noh id Sabah.
Koilo do kogumuan sada paus om sada pari id kawaigan Sabah di au tingoligon miampai tototopot om kopotindalan di nokoingkawas miampai okito kopio idsuang timpu tolu ngopod toun di nakatalib, puru SSPA pinoposompuru do kabaalan diolo montok papanau do tolu kaparagatan koiyonon tagayo.
Ponorikohon dau, Aderick Chong minoboros do iman-imanon ponokodung SSPA poompus toun tabantalan nga montok popogirot do kopomogompian sada paus om sada pari id Malaysia, miampai manahak pongintongan kumaa Sabah - ih ponogi pogun kiguno kopio montok goduo-duo ‘spesies’ diti.
Montok momodimpot do imanimanon diti, papaharo SSPA do pisokodungan miampai koupisan porinta ih kikoompitan montok popoingkawas do undang-undang montok kopongoligan sada paus om sada pari id mogisusuai bogian, papalaku do kopongoligan timpu tanaru id bogian kabansaan.
“Koponginwaguan undang-undang om ralan tonudon sokodungon miampai ponoriukan, ih kaampai noh ponoriukan kawawagu kokomoi do gatang dagang ‘spesies’ diti om kopotindalan tumanud do pokirikotan ponginsadaan nangku toiko kapamagakaman panampaning. Ponoriukan nogi kopongintong kumaa gatang dagang montok sada paus om sada pari kikoompitan ‘ekoponombuluian’.
“Pongintongan nokomoi do kopurimanan, kopongintong dagai papanau do kimpin di kiwaya montok monokodung koponginwaguan undang-undang om ralan tonudon kopoompit do momonsoi ralan tonudon gisom susumikul om tinimungan monginsada - kokomoi do kogunoon kopio ‘biologi’ om kousinan montok sada paus om sada pari,” ka dau id kopoilaan koniab.
Minoboros isio do SSPA mamalan papaharo do pirubaan miampai momonsoi kapatantuan ontok Mac toun tabantalan montok kapasagaan ‘Vision 2030’ om papatantu do palan laang montok papatantu do kopongoligan sada paus om sada pari id kawaigan Sabah om kalapas dilo.
SSPA kaampai mantad Land Empowerment Animals People (LEAP), Koisnaan Obingupus Kinoiyonon Malaysia raan Sabah, Scuba Junkie SEAS, Shark Stewards, Scubazoo, Tropical Research and Conservation Centre (TRACC) om WWF-Malaysia.-Bernama