‘Borneo Quad Biking’ pamagayat kawawagu tutumombului rumikot id Tudan Kiulu
KOTA KINABALU:‘ Borneo quad biking’ ih pinointutun do iso komponi ponombuluian kinoiyonon id Kampung Mantob ih poinsumpak kiikira 60 Kilometer mantad Kota Kinabalu nosiliu iso kagu pamagayatan kawawagu tutumobului rumikot id bogian Tudan Kiulu.
Kaparagatan ‘quad bike’ toiko motosikal apat tayar dilo nopo nga kaparagatan ponombuluian okitonan do pinghambaan labus ih mogowit do orohian ngawi sipoot asaru gunoon koponguriman do toilalaan popohibok do ‘quad bike’ rumikot id piipiro tiyonon di kagayat, maya ralan kinuluhon di koponokialit kopio id bogian tudan Kiulu.
Monijor pamadagangan Borneo Eco Tour Nancy Lamau minoboros do kaparagatan dino nokomoi winonsoi montok toinsanan orohian ngawi sipoot asaru gunoon ih muhang mogium kasanangan om toilalaan papanau ‘quad bike’ songowian paganakan, tambalut ngawi toiko tambalut soingkaraja.
“Kaparagatan ‘quad bike’ ih tumimpuun id Kampung Mantob dilo maganu timpu kiikira duo gisom tolu jam miampai kosoduo pindalanan kiikira 20 Kilometer kawaya do piipiro kampung id bogian Tudan Kiulu kaampung noh Kampung Pinahawon, Mangkaladom, Polod om Kampung Gonipis.
“Suai ko kopuriman do kolumison kinoiyonon sandad di kobilangan miagal koiyonon kinuluhon om koluyungan bawang di olumis, mampayat ngawi ih mamung do kaparagatan dilo nogi kikosiwatan mongintong sondiri kaparagatan pomutanaman miagal pomutanaman parai di nosiliu asil kakamot kapalabusan tagayo id bogian dilo,” ka disio kumaa Bernama.
Minoboros ih Nancy do pinghambaan ‘quad bike’ dilo ukabon tikid tadau miampai duo timpu ilo nopo nga kosuabon om sosodopon.
Ka disio, kiharo duo ‘pakej’ montok umampai do kaparagatan dilo miampai rontob baraian di misusuai.
Montok tulun ngawi ih sumakai do padsakaian sondiri mongoi id tiyonon kaparagatan ‘quad bike’ id Kampung Mantob, kabarai iyolo do RM150.
“Poposodia tokou nogi do ‘pakej’ poimbida ih polokuon gisom 31 Mac 2018 ilo nopo nga posodiaon iyolo do padsakaian mantad Kota Kinabalu rumikot id Kampung Mantob miampai pakej RM200 songulun mampayat,” ka disio.
Poingkuro poh nga ka disio, mampayat ngawi tumanud doid piipiro kooturan montok mongilag do nunu noopo kaantakan di au osonong, hinonggo mampayat ngawi mositi kiumur 18 toun minsawat om haro lisin korita toiko motosikal,” ka disio.
Minoboros ih nancy do koumatan koumoligan miagal tupi keledar, sarung longon om pomohokop wuron patahakon kumaa mampayat ngawi suai ko tudukan montok papanau do ‘quad bike’. Bernama