Montok dazanak ngavi poimbida
# SMC nokotoimo tohuod RM22,000 mantad AHAM
KOTA KINABALU: Affin Hwang Asset Management Berhad (AHAM) minanaak do tohuod soginumu RM22,000 doid Pusat Seri Mengasih (SMC) sabaagi haang monuhung hongkod dino papagaan do kavagatan papanau kapaagatan tikid tadau.
Potunud Monoina AHAM Teng Chee Wai minoboos do asaasau o boogizan dosido popouhan do tonggungan sosial korporat (CSR) montok mogiigizon kinoizonon.
“Apaagat kozo SMC montok monokodung ningkokoton dazanak ngavi poimbida montok momodimpot kobulihan poimponu dosido.
“Sabaagi iso tinan kotundunan, papanau kapaagatan tikid tadau SMC tantu no do humansan kozo doid sokodung om tohuod mantad tuhun ginumuan.
“Sabaati suntu, nakapangazu no SMC do ‘Heroes Run’ piipio vuhan nakatahib,” ka disido id Abaabazan Kapanaakan Tohuod dino, koniab.
Minoboos isido popouhan nogi AHAM do piipio vagu abaabazan CSR poompus toun diti id piipio tiizonon miaga Kuching, Kuala Lumpur, Kota Kinabalu, Pulau Pinang om Johor Baru.
Namot dino, Potunud Eksekutif Pusat Seri Mengasih Monica Chua minoboos do kapaagatan hongkod dino kopomoguno balanja soginumu RM70,000 somvuhan.
“Yuran ih nopuu tikid vuhan mantad mohoing ih papaatod tanak dioho doiti nopo nga soginumu RM25,000.
“Ginumu dino au kamampu momogonop kos balanja kohobi dino om sansagan dagai mogium lahan tavasi montok momo’uang kousinan di posodia kivaa miampai manganjul do abaabazan panangkusan pomiukutan om susuvai po,” ka disido.
Ka disido SMC mundaiu dati doid hinominon vagu ih opongo dati ontok toun 2019 doiho id Sulaman Kingfisher, id douvi Taman Kingfisher miampai kahaabon tohu ekar.
Minoboos isido apatut nopo hongkod dino tumimpuun mundahiu ontok April toun dumonto nga sabap do kinahaidan mantad kavo panadaan om sansagan magandad gisom toun 2019.
“Nokosodia tokou no sokio ko poundohion ontok songian timpu noopo. Kounahan posodia kivaa doiti oviton tokou nogi nung poundohion doid koizonon kavavagu montok momohid do pomiubatan sabap do kounahan dino nokomoi kakaal avasi montok gunoon.
“Boogizan dagai kivaa panasahan tokuudi sabap koputusan kopoundahian dino sabap nokohobi no kootulan di pinatantu nga iho okon magandad kopoindahanan pambalajalan susumikul doiti,” ka disido.
Namot dino, Potunud Abaabazan om Kotoinaan SMC Jenny Tham minoboos do tohuod ih notoimo dino nopo nga kilati kozo montok SMC sabap iho kamampu monuhung papagaan do kavagatan.
“Ahansan tokou do hobi ogumu agensi, tinan korporat om tuhun misosondii manaak do tohuod montok monuhung susumikul doiti ih momoguno do hobi ogumu pongintongan daasom papanau do pinghudaan id hongkod dino nokomoi,” ka disido.
Ka disido gisom baino diti, hongkod dino nokomoi kivaa 43 pakakalaja montok monuhung momohuda om monoina hongkod dino nokomoi ih koposuvang do 90 susumikul poimbida.
“Momoguno nogi o boogizan dagai do haang ‘psikologi’ kaamung no kopomogunaan ‘Dousa Hou’ om ‘Kololo’ miampai teknologi Jepun montok momo’ia dazanak ngavi ‘autisme’ om nogi monuhung kapapanaan pomusaavan dioho,” ka disido.
Monoimo nogi SMC do susumikul kotimpuunon umul himo gisom 35 toun montok monuhung tinimungan dino nokomoi papanau do kopoposizon ‘sosial’ miaga tuhun koubasanan, mantad poindikau id daamin miampai aiso nunuunu todoon.