Mohoingon Kampung, KMC papaazu Lamai Kaamatan
PENAMPANG: Apat Mukim Kuut Mamasok Penampang mangazu Lamai Kaamatan ontok July 8 id Sinasavat Tagal Babagon doiti, tumimpuun doid 8 doungosuvab gisom 6 doungosodop.
Ponikoon nopo do lamai naait nga i WKAN Pius Kunsung om ontok kotuubungai do monunuat diti dii koniab, minoboos isido do Lamai Kaamatan diti manaak kosivatan do mohoingon kampung ngaavi do mogititimung sabap au haid izioho notimung id vuhan May, sabap natangkangau do tuminindapou do abaabazan Lamai Tadau Tagazo Kaamatan id uvang diti.
“Mohoingon Kampung (KK), Kapitan Sina, Hansanon Huguan Mamasok (WKAN) nga natangkangau montok abaabazan Tadau Tagazo Kaamatan May, 2017. Dadi aiso to timpu dioho do mogititmung miampai suvai KK, KMC om puu paganakan dioho.
“Dadi ontok July 8, tadau dino nopo nga montok do KK/KKMC/WKAN do mogisosoomo miampai puu paganakan dioho. Abaabazan nait nga koinsan nogi do aazu. Puu komiti nga ongounung do monoodo kalaja nakataak om iti popokito do pisoan do momumuuan layat id Uvang Penampang,” ka disido.
Vookon nopo do abaabazan ontok kalamazan dino nga: piboian Sugandoi montok KK/KKMC - onu nopo hozou songkotoun i aanu humozou, piboian Magansak koubasanan, piboian Magagung montok apat Mukim, piboian Sumazau montok KK ngaavi, piboian Kinuama tuntuu miaga, tongkungon, suling om suvai po.
Lamai naait nopo nga poimogonon dii Ponikoon Barisan Nasional Penampang, Datuk Donald Mojuntin. Pisosoomo do koikot nogi i Datuk John Ambrose Dumpangol, huguan Umno Penampang, huguan MCA Penampang, Datuk Francis Goh om huguan komponen paati BN, Upisol Uvang Penampang, Luvita Koisun, Huguan Uvang Penampang, OKK Bryan Matasing om susuvai po.
“Ahansan do tobpinaai ngaavi id somok miaga Kampung Togudon, Kg Moyog, Kg Kibunut, Kg Rugading,Kg Noturus, Kg Madsiang, Kg Kipouvo om hoohobi no kozo do mogiigizon id hamin monompuan Kg Babagon nga koikot do lumamai miampai do momumuuan mogigizon id Penampang,” ka vagu dii Pius.