Popoidu tanak buu kagazat kozo do tutumombuhui
KOTA KINABALU: Popoidu tanak buu nga iso kaanangan om kagazat do tutumombuhui montok Kudat, ka dii montili Poimbida Kalaja Datuk Teo Chee Kang.
Ka disido tuhun kampung mositi mingat do koumohigan om ponomposizan do buu i kopogovit do kounalan ikonomi montok dioho.
Teo ponoogi o hansanon layat Tanjong Kapor, minonong-kotohuod om minangazou do Koisaan Ponomposiazan Buu Kudat (KTCS), WWF Kudat om toinsanan nokogompit montok do kalaja dioho tavasi do manampasi do buu id Kudat.
“Nokoiho zou do id pipio toun nakahatib, nokopoidu izioho hobi 4,550 tanak buu kumaa doid daat.
“Kopoiduan do 100 tanak buu id Kampung Bavang Gazo Jamal ontok July 1 i nakagazat hobi 200 tutumombuhui id suang om dahabus pogun nga iso susuzan kahantazan,” ka disido.
Teo minoboos do tuhun kampung mositi koondom do koumohigan om ponomposizan do kavo binatang diti nga kopogovit do koumbosian montok do tuhun.
Dadi sinunsub disido o tuhun kampung i poingizon id tisan daat do popoluput kumaa KTCS toi WWF nung kokito izioho do tontohu buu aabak om maan izioho poiudo kumaa doid daat.
Naamot, songuhunupisol KTC Norfizilah Rahman minoboos do kopoiduan do tanak buu nga iso kounsikaan oimato do tuhun kinoizonon om tutumombuhui mantad suvai pogun i kokito do abaabazan dino koinsan nogi.
“Kivao 200 tuhun minikot montok do abaabazan dii, kaamung tutumombuhui mantad China, Australia, Germany om Netherlands. Kogumuan dioho minogovit do tanak dioho id abaabazan dii.
“Koisaan nga minaganu nogi do kosivatan do papalati dii minampazat montok do ponomposizan do buu maza video om bobooson,” ka vagu dosido.
Norfazilah minoboos do iso kahasaan tagazo do maganu tontou do buu.
“I nopo tanak buu pinoidu dagai id June nga natampasi mantad Pulou Malawali om pinoundahiu id tampat pogontohuanan dagai.”
Ka vagu dosido koisaan nakaanu 4,000 tontohu buu id 2012 katapi ginumu do pogontohuanan buu daat id tampat dii nga nokuang sabap abaabazan do tuhun.
Huguan tinimungan WWF Kudat, Joannie Jomitol minoboos kinopoiduan tanak buu nga katamaba do hoogo kotombuhuzan montok Kudat.
“Tutumombuhui anangan kozo mintong do popoidu tanak buu.
“Oondom ku do au ogumu o abaabazan miaga diti id koibutan toi tisan daat kotonobon Sabah, okon ko miaga id tisan daat kohisaon id nombo ogumu tanak buu poiduon.”
Joannie minoboos nogi do WWF kumalaja miampai Upis Tazamtosizau Sabah do monoodo pomohudaan montok pakakalaja kogompit.
Pinosoto dosido do babaino kivao 112 tuhun nohuda kaamung tuhun mogigizon id Tun Mustapha Park.
Ka dosido WWF nga manakadai nogi do mogigizon id Pulou Tigabu om Pulou Tiga do monoodo pogontohuanan om mongia dioho do mongumohig do buu.