Pomusaavan tadau baino Di Peter Lidadun
IZOU nopo do dau, nga ii no Bible o dogo do buuk tagazo kozo; om sabap no diho, do induvo ku nodii kaavi do papadahin iho: iso dahin oitan do ‘dynamic’, iso dahin oitan do ‘literal’ diho Testamintum Haid om diho Testamintum Kavavagu.
Mantad diho buuk nokomoi ku, okito ku o kopooposizon, pogiigizon, kogiiginovoo om koimaan do tuhun: do mantad po dii tinimpuunon i; om pooompus nodii do timpu gisom baino om, dati, do touvi kozo.
Abasa ku nopo iho Gen. 2: 16-17 om pooputon ku no iho Gen. 3: 1-24; nga olotian ku do: kada imang gaga om kada imang havan dii ponuu di Kinoingan; om imang no ivad mantad saviavi dii pogoduan di Kinoingan.
Id Gen. 3: 1-7, noduung ii komohoingan dotokou kumoiso nogi. Nookuo tu noduung? Basao no iho kotob Gen. 3:1-7 om lotion no kozo; ingkuo po nga nokoongou, o Kristian, do oonu o simba diho tudizo do: Nookuo tu noduung ii komohoingan dotokou kumoiso nogi?
Om id Gen. 3: 8-13 pinointahang di komohoingan dotokou kumoiso nogi do nookuo tu nakahavan izioho dii ponuu di Kinoingan om nokoimang dii pogoduan di Kinoingan. Ii komohoingan kusai, pinopotondos doid dii komohoingan tondu, pinopotondos doid dii ‘vuhanut’: minogitootondos. Isai o tandasan dii ‘vuhanut’?
Om basaon nodii do ‘oonu’ ka di Kinoingan do minoboos (minanaau) doid di komohoingan tondu, om doid di komohoingan kusai om doid di ‘vuhanut’. Lotion nodii iho om opiumanan iho? Nga nunu daa ii nimaan, mooi do au kaanu do koundasaan miaga diho nosuat di Gen. 3:14-19? Mositi mimozo di Kinoingan! Noimozo i naku tomoimo?
Oloolotian ku izou, do dau bo, do omungkang (o ginavo?) dii komohoingan dotokou; duduungon, tamaha?’ osumbung?, mongki’oo’omit di Kinoingan?, kigiiginavo nogi, dati, do umahib di Kinoingan?
Dadi, ii podii sinakagon ngaavi dioho (zotokou no ino) nga noohian dii douso di komohoingan dotokou kumoiso nogi; om iti nodii o piipiumonon dotokou. Om oundoso tokou no kozo? Nga notobus zou no di Kristus; poingivang ii pogovitan disido dogo - surga. Om nung kakal do oundoso zou doiti id pomogunan, nga sabap i do douso ku om do douso do tuhun.
Sundung i ma do ingkaa o ginazo do douso di komohoingan dotokou kumoiso nogi, nga obinsianan i kozo, oupus om guminavo dotokou i Kinoingan: tu, sabaagi Kristian zou, pibaabasa ku nopo iho Testamintum Vagu; om ovio ku nodii poogi do papadahin iho, doid boos dotokou. Om basaon ku nopo ii susui do koponobusan, koginavaan, kobinsianan, upus, kopomohiongan, kopongia’an, tutuduk, kopotunudan dii mononobus doid dotokou, nga agazo no kozo o koinsasamadan kumaa doid dogo... notobus zou.
Nung atanud ku om oimozo ku poimponu ii susui, ponuu om tutuduk di Mononobus, nga ingkuo po nga opiumanan ku ii ‘miagaaga’ do doun surga, sundung potuu do doiti zou po id diti pomogunan ‘naamot’. Mogiupus-upus tokou i naku?
Nga ii podii do miaga ko ‘kakal nopo do poimponu do komungkangan’. Dadi notobus zou nodii daa, kokomoi do sumuang do surga, nga kakal nopo do opiumanan ku o koundasaan. Nung miuhit-uhit o susuzan kokomoi do douso, nga iti no motuu iho topiumanan ku.
Nung oundoso zou sabap do noohian do douso di komohoingan kumoiso nogi, nga baino, notobus zou no. Nga ingkuo nu nung sokio no, do oundoso zou sabap do noohian zou do douso ngaavi do tuhun ngaavi baino. Isai nodii vagu o monobus dogo, do id doun poopomogunan bo?