Onom pinonobokan kouvang
# Monginsada nosinduahan kozo sinangod id sakai kapal, ‘suspek’ tinaan id iso stesen tumau
KOTA KINABALU: Songuhun monginsada nosinduahan kozo kahapas tinobok kiginumu inggonom di tambahut disido ih naavuk sabap au nokopilati id Kampung Lok Poring.
Huguan Pulis Uvang Kota Kinabalu Asisten Komisioner M Chandra minoboos do kinantakan jam 6 sosodopon tadau Koduvo dino nantakan do naamot munggui om ‘suspek’ om duvo vagu kouvang monginum tiinumon kaavuk id savat kapal dosido.
“Suspek ih au nakaanu minanamong tinan sabap naavuk kahapas dino minonompiling kouvang dau ih minonigovo natadon do munggui minongudizo kogiiginovoon ‘suspek’ dino.
“Ohodong sabap nuudizo, ‘suspek’ minaganu pisau om minaganu haang miampai minanangod munggui id suvang hinimput kapal.
“Id pinanangadan dino, munggui ih kiumul 30 toun nosinduahan kozo kahapas tinobok inggonom id boogizan douvi, om hunggazan gibang poguhui pinaatod doid Hamin Pongusapan Tuaran montok pokiubatan,” ka disido.
Minoboos Chandra do munggui ih natagakan ogumu zaa om kopotongob dino pinoundahiu doid Hospital Queen Elizabeth montok pokiubatan potihombus.
Ka disido, pinonoizukan potihombus nokoiho do kinantakan nantakan sabap au nokopilati piahatan goduvo-duvo tinan do naamot kivaa id koozuvon naavuk.
“Minaganu haang mantad kopoihaan, boogizan pulis kahapas dino pinapanau ‘operasi’ montok mogium ‘suspek’.
“Asil kopoihaan tuhun ginumuan, ‘suspek’ kiumul 27 toun di aiso suat kointutunan tinan nakaanu minanaan id stesen tumau Lahan Tuaran id jam 11.45 kosuvabon tadau Kotohu,” ka disido.
Minoboos isido, kes diti soizukon tumanud Seksyen 326 Kanun Koundosoan.