Poruntukan RM400,000 monginsonong kounalan id Kg. Tetabuan
BELURAN: Kapanahakan poruntukan kiginumu RM400,000 montok monginsonong kounalan kiguno id Kampung Tetabuan ponokotanda do kikoinsamadan o porinta montok manalasai do kobolingkangan kounalan kiguno kopio id labus kakadaian.
Puru Parlimen Beluran Datuk Seri Dr Ronald Kiandee minoboros do poruntukan dilo kaamung noh kopoompit do pamansaian sunsuyon, sakadai koumatan ngawi kumaa monginsada kampung dilo om piipiro pamansaian kounalan suai.
Ka disio, kapanahakan poruntukan montok kotundaan diti ponokotanda do kikosianan o porinta montok kolumaagan rayat.
“Poingkuro poh nga kampung diti kakaal momoguno do lobi ogumu kousinan kotundaan montok monginsonong kounalan kiguno, pamansaian lamin id suriba abaabayan sakadai lamin, kounalan lotirik 24 jam om koumatan montok popoingkawas do ‘sosio ekonomi’ mogigion.
“Pokigunoon nogi nopo nga pomoruhangan kapanaakan waig tolidang, om kotorinaan kolidasan,” ka disio id Abaaabayan Songowian Rayat id Kg. Tetabuan di tadau Kolimo.
Ronald ih nogi Kumoduo Yang Dipertua Dewan Rakyat mokianu rayat tuh tumilombus manahak sokodung kumaa porinta om au oimbayatan miampai ponombirangan pulitik pambangkang.
Otumbayaan isio do karaja potilombus kaanu doti papalantoi gaab mogigion labus kakadaian montok kapaganu do kounalan di lobi tosonong.
Tumanud disio, koporintaan Barisan Nasional (BN) nopo nga porinta kitonggungan di okon noopo manahak pongintongan doid koponguhanan kounalan kiguno katapi papaharo do abaabayan ngawi ‘ekonomi’ montok popoingkawas do konuonuan rayat.
Ka disio, abaabayan popiirad gatang tumau, gatang barangan kogunoon om sakadai kopoposion monginsada nakapanahak asil kumaa mogigion kampung labus kakadaian kaamung Kg. Tetabuan.
Minoboros ih Ronald do mogigion labus kakadaian kiguno kopio tumilombus mamagahau kosiwatan ngawi di posodiaon do porinta montok popomogot do konuonuan sompori-pori.